Qyzylordada taksı júrgizýshisin óltirgen eki adam sottaldy
Bul oqıǵa byltyr jazda bolǵan. Qyzylorda qalasynda turatyn eki er adam aldymen syra ishken. Sodan keıin «Mereı» shaǵyn aýdanyna baryp kóńil kóterýdi jalǵastyrmaq bolady. Ol jaqtan úıine qaıtar ýaqytynda taksı ustaıdy. Olar taksı júrgizýshisine ózderin qalanyń shetki aımaǵyndaǵy Qultekenov kóshesine aparýyn suraıdy.
Kelisken jerge jetkennen keıin ekeýi jolaqyny tólemesten kólikten túsip ketýge áreket jasaıdy. Sol sátte taksı júrgizýshisi jolaqy tóleýdi talap etken. Budan keıin janjal bastalady. Biri taksı júrgizýshisin uryp-soǵyp jatqan sátte ekinshisi júrgizýshisiniń keýde tusynan birneshe márte pyshaqtaıdy.
«Pyshaqtyń júzi jábirlenýshiniń keýde qýysyna enip, densaýlyǵyna aýyr zııan keltirgen. Sonyń saldarynan taksı júrgizýshisi qaıtys bolǵan», - dedi Qyzylorda oblysynyń mamandandyrylǵan aýdanaralyq sotynyń tóraǵasy Ashat Sabyrov.
Eki sottalýshy da QR Qylmystyq kodeksiniń 99-baby 2-bóliginiń 7-tarmaǵymen, 188-babynyń 2-bóligi 1-tarmaǵymen, 200-babynyń 4-bóligi boıynsha kináli dep tanyldy. Sottalýshylar 16 jylǵa bas bostandyǵynan aıyryldy.
Eske sala ketsek, budan buryn Qyzylordada burynǵy kúıeýin óltirýge adam jaldaǵan áıel sottalǵan bolatyn.