Qyzylordada «Taǵzym alańy» qaıta jańǵyrtylady
QYZYLORDA. QazAqparat - Qyzylorda qalasyndaǵy «Taǵzym alańy» aýmaǵynda qaıta jańǵyrtý jumystary qolǵa alyndy, dep habarlaıdy QazAqparat tilshisi.
Atalǵan jumystarmen qala ákimi Nurlybek Nálibaev oblys ortalyǵyn aralaý barysynda jan-jaqty tanysty.
Bul jumysqa «Jumyspen qamtýdyń jol kartasy» memlekettik baǵdarlamasy aıasynda respýblıkalyq bıýdjetten qarjy qaralǵan. Qazir onda ekinshi dúnıejúzilik soǵysta eren erlik kórsetken qyzylordalyq batyrlardy eske alýǵa arnalǵan eskertkish taqtalar jańartyldy. Maıdangerler esimi «arhıtas brendiniń» taqtaıshalaryna jazylady. Taqtaıshalardy bekitý úshin steklokompozıt materıalynan 16 tuǵyr salynǵan. Zamanaýı materıaldyń sýǵa, kúnge tózimidiligi joǵary.
Qazirgi ýaqytta josparǵa saı alańnyń 5780 sharshy metr aýmaǵyna túrli-tústi, 530 sharshy metr jerine sur tas tóseýishteri tóselip, bordıýrlar qoıylǵan. Demalýshylar úshin 30 dana oryndyq ornatylyp, nysan 300 metr temir qorshaýmen qorshalady.
Jańǵyrtý jumystaryna jaýapty «Asanas-Dar» JShS túngi jaryqtandyrý shamdaryn jańalap, 10 450 sharshy metr kógaldandyrý jumystaryn óz qarjysy esebinen júrgizip, demeýshilik jasady. Alańdy qaıta jańǵyrtý qyrkúıek aıynyń ortysynda tolyǵymen aıaqtalady.
Sondaı-aq, Qyzylorda qalasynda bıyl 1244 kásipkerlik nysany ashyldy.
