Qyzylordada taǵy eki adamnyń koronavırýs ınfektsııasyn qaıdan juqtyrǵany anyqtaldy

QYZYLORDA. QazAqparat - Qyzylorda oblysynda koronavırýs ınfektsııasyn juqtyrǵan taǵy eki adam tirkeldi. Qazir oblysta atalǵan dıagnozben 28 adam em alýda, dep habarlaıdy QazAqparat tilshisi.

Bul týraly Óńirlik kommýnıkatsııalar qyzmeti alańynda oblystyq densaýlyq saqtaý basqarmasy basshysy Jaqsylyq Abdýsametov habarlady.

«2020 jyldyń 3 sáýiri kúni jergilikti ýaqytpen saǵat 16.15-te COVID-19 vırýsynyń jańadan 2 jaǵdaıy tirkeldi. Anyqtalǵan 2 azamat Shıeli jáne Qarmaqshy aýdandarynyń turǵyndary. Olar budan buryn COVID-19 vırýsyn juqtyrǵan adamdarmen baılanysta bolǵan. Jaǵdaılary qanaǵattanarlyq»,-dedi Jaqsylyq Ábilqasymuly.

Qazirgi tańda oblysta koronavırýs ınfektsııasy anyqtalǵan azamattarmen qarym-qatynasta bolǵan 662 adam bar. Onyń 237-si karantınde, 425 -si úı jaǵdaıynda baqylaýda.

Sondaı-aq, qyzylordalyq kásipkerler ıeligindegi ǵımarattardy karantın úshin bosatyp beretinin habarlady.