Qyzylordada taǵy bir aýyl tabıǵı gaz qubyryna qosyldy
Qyzylorda oblysy eldi mekenderin gazben qamtýda «Beıneý-Bozoı-Shymkent» magıstraldy gaz qubyrynyń paıdasy tıip otyr.
Aýdanda búginge deıin Shıeli kenti men Baıterek, Jańaturmys, Bıdaıkól aýyldyq okrýgteri «kógildir otynǵa» qosylǵan. Endi olardyń qataryna Nartaı Bekjanov eldi mekeni de qosylyp otyr. Aýylda turatyn 540 úıge osylaısha gazdyń ıgiligin kóretin bolady. Al jeltoqsan aıynda olardyń qataryn Qodamanov aýylyndaǵy 525 úı tolyqtyrady. Nátıjesinde aýdan turǵyndarynyń 65 paıyzy gazben qamtylady.
«Bul jobaǵa óńirlerdi damytýdyń 2025 jylǵa deıingi baǵdarlamasy aıasynda quny 374,6 mln.teńge qarajat qaralǵan. Jospar boıynsha 540 úı tabıǵı gazǵa qosylady. Qurylys jumysyn bas merdiger «Trans Azııa Konstrakshn» kompanııasy júrgizdi», - dedi aýdan ákimi Narıman Maqulbekov.
Bul baǵyttaǵy jumystar aldaǵy ýaqytta jalǵasyn tabady. Oblys ákiminiń qoldaýymen «Jol kartasy» baǵdarlamasy aıasynda Aqmaıa jáne Alǵabas aýyldyq okrýgterine gaz qubyryn júrgiziý úshin 745 mln.teńge qaralǵan. Qurylys jumystary jaqyn arada bastalady. Munan bólek Bestam, Aqtoǵan, Jıdeliaryq, Eńbekshi Almaly, Telkól eldimekenderin gazdandyrýǵa qajetti qujattar ázirlendi. Búginde 4 eldi mekenniń memlekettik saraptama qorytyndysy alynsa, 2 eldi mekenniń qujaty saraptamaǵa tapsyryldy.
Eske salsaq, oblysta gazdandyrý jumystary qarqyndy júrýde. Negizgi úles 65 paıyzǵa jetti. Bıyl Tereńózek, Josaly men Jalaǵash kentteri sekildi aýdan ortalyqtary gazdandyrylǵan. Jyl sońyna deıin oblysta gazben jabdyqtaý úlesin 67,4 paıyzǵa deıin jetkizý josparlanyp otyr.
