Qyzylordada tabıǵatty qorǵaý zańdylyǵyn saqtamaǵan kompanııa 1,5 mlrd teńge tóledi
QYZYLORDA. QazAqparat - Qyzylorda oblystyq prokýratýrasy tabıǵat qorǵaý zańdylyǵyn saqtamaǵan «SNPS-Aı Dan Munaı» aktsıonerlik qoǵamynan memleketke 1,5 mlrd teńgeden astam qarjy óndirdi, dep habarlaıdy QazAqparat Qyzylorda oblystyq prokýratýrasyna silteme jasap.
Qyzylorda oblystyq prokýratýrasy tabıǵat qorǵaý zańdylyǵy baǵytynda taldaý sharalaryn júrgizdi. Osynyń nátıjesinde 2016 jyly «SNPS-Aı Dan Munaı» AQ sol ýaqytta jınaýǵa, ornalastyrýǵa jáne saqtaýǵa quqyǵy joq uıymǵa óndiristik qaldyqtardy bergeni belgili boldy.
«Qadaǵalaý aktisine sáıkes, memlekettik kiris departamenti aktsıonerlik qoǵamǵa jáne qaldyq óńdeıtin mekemege de 1,5 mlrd. teńge kóleminde emıssııa tólemin jasaý qajettiligi týraly habarlama berdi. Atalǵan derek boıynsha eki jyl boıy AQ-ǵa joldanǵan habarlama boıynsha sot talqylaýy jalǵasty. Bul daýǵa qatysty 2018 jyldyń 22 qarashasyndaǵy Joǵarǵy Sottyń qaýlysyna sáıkes departamenttiń áreketi zańdy dep tanyldy. Qosymsha aqy mólsheri bıýdjetke tolyq tólendi», - dep jazylǵan Qyzylorda oblystyq prokýratýrasy taratqan habarlamada.
Sonymen qatar, zańdy tulǵaǵa ákimshilik quqyq buzýshylyq týraly kodeksiniń 278-babynyń 1-tarmaǵyna sáıkes bıýdjetke salyq jáne bıýdjetke tólenetin basqa da mindetti tólemder mólsherin tómendetkeni úshin ákimshilik jaýapkershilikke tartylyp, 622 mln. teńge mólsherinde aıyppul salyndy.
