Qyzylordada «Syr jurty» tanymdyq-passıonarlyq jobasy jumysyn bastady
Bul jóninde oblys ákiminiń orynbasary Serik Ahmet óńirlik kommýnıkatsııa qyzmetiniń alańynda ótken brıfıngide málim etti. Atalǵan ıgi is «Syr eli» mega jobasy sheńberinde júzege asady.
«Aıta keteıik, «Syr eli» mega jobasy ótken jyly bastaý aldy. Sonyń sheńberinde ishki saıasat salasynyń Syr qoǵamy, mádenıettiń Syr shańyraǵy, assambleıanyń Syr birligi, jastardyń Syr bolashaǵy, sporttyń Syr sporty sekildi salalyq baǵyttar arqyly júzege asyrylýda. Bıyl kóktemde mega joba sheńberinde Táýelsizdigimizdiń 30 jyldyǵyna Tuńǵysh Prezıdent - Elbasynyń «Rýhanı jańǵyrý» baǵdarlamasy men Memleket basshysy Qasym-Jomart Toqaevtyń «Táýelsizdik bárinen qymbat» maqalasy negizinde «Syr jurty» tanymdyq-passıonarlyq jobasy ázirlendi. Joba úsh jylǵa josparlanǵan. Ol «Syr sańlaqtary», «Týǵan jer – tunǵan shejire», «Tal besikten – jer besikke deıin», «Syr eli – Jyr eli», «Syr óńiri – ulttyq qundylyqtardyń temirqazyǵy» sekildi bes baǵyttan turady», - dedi oblys ákiminiń orynbasary.
Koronavırýs pandemııasyna qaramastan bıyl 113 túrli formatty sharalar men jobalardan turatyn jospardyń 80-nen astam sharasy ótkizilip, olarǵa 20 myńǵa jýyq adam qatysty. Aıta ketý kerek, birqatar sharalar onlaın formatta uıymdastyryldy.
Atap aıtsaq, «Syr sańlaqtary» baǵyty boıynsha - sáýir aıynan bastap oblystyq tarıhı-ólketaný mýzeıiniń «Aqmeshit» fılıaly men «Qyzylorda» telearnasynyń birlesken «Qundy jádiger» televızııalyq jobasy bastaý aldy.
«Máńgilik saryn - Qorqyt ata murasy» atty oblystyq onlaın qyl qobyzshylardyń festıvali, «Tuǵyry bıik Táýelsizdik» atty respýblıkalyq aqyndar aıtysy ótkizildi. Oǵan Aıbek Qalıev, Bekarys Shoıbekov, Ásem Erejeqyzy, Aspanbek Shuǵataev, Muhtar Nııazov, Nurmat Mansurov bastaǵan respýblıkaǵa tanymal 12 aqyn qatysty.
Balalardyń kitap oqýǵa degen qyzyǵýshylyǵyn arttyrý maqsatynda oblys kitaphanalarynda «Balalar ádebıeti» aıdary, «Jazǵy kitaphana», «Ertegimen eseıem», «Ájem aıtqan ertegi», oblys mýzeılerinde «Tarıhı tulǵalar», «Bul úıde kim turǵan?», «Mýzeı radıosy», «Asyl mura», «Jas ólketanýshy», «Kıeli mura» jobalary júzege asyrylýda.
«Týǵan jer - tuńǵan shejire» baǵyty boıynsha aqpan-sáýir aılarynda ortaǵasyrlyq Syǵanaq qalashyǵyna, Oqshy Ata, Tólegetaı qylyshty baba kesenelerine M.Mámetova atyndaǵy joǵary pedagogıkalyq kolledji jáne «Orda» joǵary kolledji stýdentteriniń qatysýymen 2 márte ekspedıtsııa jaaldy. Osyndaı sharalar Qazaly aýdanynyń stýdentteri men tarıhshy-ólketanýshylarynyń qatysýymen «Tarıh-Týrızm» taqyrybynda ortaǵasyrlyq Jankent qalashyǵyna, Qosym qoja, Dáýlet baqsy, Sartaı batyr, Aq ıshan, Qarasaqal Erimbet, Adam ata kesenelerine júrgizildi.
Oblys ákimi orynbasarynyń aıtýynsha, Táýelsizdiktiń 30 jyldyǵyna oraı oblystyq ishki saıasat basqarmasy, qala jáne aýdan ákimdikteri men «Aq sóıle» qoǵamdyq birlestiginiń uıymdastyrýymen «Syr daryny» jastar shyǵarmashylyq baıqaýy bastaldy. Konkýrs jazba aqyndyq óner, aıtys, dástúrli án jáne jyr-terme baǵyttary boıynsha ótkizilip, respýblıkalyq jas aqyndar aıtysymen túıindeledi.
Al, «Tal besikten jer besikke deıin...» baǵyty boıynsha «Qaıyrymdy ister marafony» jalpyulttyq jobasynyń negizinde Bilim basqarmasynyń uıymdastyrýmen Otbasy úlgisindegi balalar aýyly tárbıelenýshilerine arnalǵan «Tálimgerler» jobasy, «Janyńda júr jaqsy adam», «Otanyma 30 qaıyrymdy qadam» aktsııalary jáne basqa da aýqymdy sharalar ótkizilgen.
«Syr eli - jyr eli» baǵyty boıynsha aqpan-naýryz aılarynda oblystyq bilim jáne mádenıet, arhıvter jáne qujattama basqarmalarynyń uıymdastyrýymen aıtysker aqyn, úsh dúrkin «Altyn dombyra» ıegeri Muhtar Nııazovpen oblystyń barlyq aýdanynda ulttyq ónerimizdi nasıhattaý, óskeleń urpaqty aıtys ónerine baýlý maqsatynda kezdesý sharalary, onlaın formatta kontserttermen basqa da mádenı sharalar ótti.
«Syr óńiri - ulttyq qundylyqtardyń temirqazyǵy» baǵyty boıynsha joǵary jáne orta arnaýly oqý oryndary stýdentterimen onlaın jáne oflaın negizinde «Adamnyń sapasy - tarıhtyń qozǵaýshy kúshi» taqyrybynda mádenıettanýshy, tarıhshy, fılosoftar men áleýmettanýshylardyń qatysýymen suqbat-kezdesýler ótkizilgen.
Oblys ákiminiń orynbasary jańadan bastaý alǵyn «Syr jurty» tanymdyq-passıonarlyq jobasy árbir azamatyń rýhanı jańǵyrý jolyna jeteleýine jol ashatynyn tilge tıek etti.
«Jobanyń basty maqsaty – óńirdiń tarıhı-saıası jáne mádenı-rýhanı daralyǵyn jan-jaqty aıshyqtap, nasıhattaý. Óskeleń jas urpaqty otanshyldyq rýhta tárbıelep, qasterli Táýelsizdigimizdiń qundylyǵyn uǵyndyrý. Ulttyq jańǵyrý kezeńindegi adamnyń jańa bolmysyn qalyptastyrý. «Syr jurty» jobasy aıasynda júrgizilgen jumystardyń nátıjesinde Syr eliniń tarıhı-mádenı jáne zııatkerlik áleýeti artyp, jańa jádigerler men tyń jańalyqtarǵa tolyǵyp, ulttyq qundylyqtarymyz ben mádenıetimizdi jastar boıyna sińirýge óz úlesin qosady dep bilemiz», - dedi Serik Ahmet.
