Qyzylordada «Syr jurty» tanymdyq-passıonarlyq jobasy iske asady
Bul Táýelsizdiktiń 30 jyldyǵy aıasynda júzege asady. Joba «Syr sańlaqtary», «Týǵan jer - tunǵan shejire», «Tal besikten - jer besikke deıin», «Syr eli - Jyr eli», «Syr óńiri - ulttyq qundylyqtardyń temirqazyǵy» sekildi 5 baǵyttan turady.
Jobany engizýdegi basty maqsat - óńirdiń tarıhı-saıası jáne mádenı-rýhanı daralyǵyn aıshyqtap, óskeleń urpaqqa táýelsizdiktiń qundylyǵyn uǵyndyrý. Joba aldaǵy 3 jylǵa josparlanǵan.
«Biz túrki jurtyna ortaq tulǵa Qorqyt atadan bastap, Syrda ómir súrgen tarıhı tulǵalar týraly telehabarlar daıyndap, ǵylymı izdenis jumystaryn júrgizip, tarıhı oryndarǵa ekskýrsııalar uıymdastyrmaqpyz. Salt-dástúrler men ádep-ǵuryptardy, tárbıe daǵdylaryn, dástúrli otbasy qundylyqtaryn, salaýatty ómir saltyn nasıhattaımyz. Jastar arasynda jyrshy-jyraýlyq, aqyndyq, kúıshilik jáne oryndaýshylyq ónerdi nasıhattaýǵa qoldaý bildiremiz» , - dedi oblys ákiminiń orynbasary Serik Ahmet.
Jobanyń birinshi kezeńinde túrli formatta 113 shara uıymdastyrylady.
Aıtý kerek, el Táýelsizdiginiń 30 jyldyǵyna arnalǵan keshendi is-sharalar jospary ázirlendi. Oǵan Táýelsizdik jyldaryndaǵy jetistikti nasıhattaıtyn túrli formattaǵy 260 shara engizilgen.