Qyzylordada «Syr úmiti» oblystyq jastar forýmy ótti
Atalmysh shara aıasynda Jastar ortalyǵy janynan prodıýserlik ortalyq ashyldy.
Bıyl Syr óńirinde óz salasynda jetistikke jetken jastar túrli marapattarǵa ıe boldy. Osyndaı qoldaýdyń nátıjesinde 125 jas azamat qala, aýdan ákimderiniń arnaıy syılyqtaryna qol jetkizdi. 2016 jyldan beri toqtap qalǵan oblys ákiminiń «Syr úmiti» forýmy bıyl qaıta jalǵasyn tapty. Sondaı-aq, aımaqtyń belsendi jastary Ǵanı Muratbaev atyndaǵy respýblıkalyq syılyqpen marapattalyp keledi.
Bıyl oblysta Jastar jylyn ótkizý jónindegi keshendi is-sharalar josparyna usynylǵan jańa jobalar qoldaý tapty. Nátıjesinde aımaq jastarynyń usynysymen tuńǵysh ret kórshiles ornalasqan túrkitildes alty el (Qazaqstan, Ázerbaıjan, Qyrǵyzstan, Bashqurstan, Túrkııa, Tatarstan) jastarynyń halyqaralyq festıvali uıymdastyryldy. Al respýblıkalyq sharalarǵa toqtalsaq, Qyzylorda oblysynyń bastamashylyǵymen halyqaralyq deńgeıdegi trenerler shaqyrylyp, jas IT-mamandardy daıarlaýǵa baǵyttalǵan «Jastar IT eshelony», aımaqtyń týrıstik áleýetin nasıhattaý, tarıhı-mádenı oryndardy tanystyrýǵa baǵyttalǵan respýblıkalyq lager, oblys ákiminiń júldesi úshin «Jaıdarman» oıynshylarynyń respýblıkalyq ázil keshi uıymdastyryldy. Oǵan qosa «Kóńildi tapqyrlar alańy» qatysýshylarymen ashyq aspan astyndaǵy jastar keshi, aýyl jastarynyń sleti, jastar eńbek brıgadalarynyń kezdesýi ótti. Sondaı-aq, jastardyń startap bıznes ıdeıalaryn jınaqtap, ınvestorlar aldynda qorǵaýǵa yqpal etetin «Kyzylorda Business Hub» jańa jobasy pılottyq rejimde birinshi ret uıymdastyryldy.
Qyzylorda oblysynyń ákimi Qýanyshbek Ysqaqov óz salasynda jetistikke jetip, marapatqa ıe bolǵan barsha jastardy quttyqtap, jyly lebizin jetkizdi.
«Osy jyly aýdandyq deńgeıdegi 3 jastar resýrstyq ortalyǵy qaıta jańǵyrtýdan ótse, Qyzylorda qalasyndaǵy Ortalyq jańa ǵımaratqa ornalastyryldy. Al, Baıqońyr qalasy jastary úshin arnaıy ǵımaratty qaıta jańǵyrtýdan ótkizýge jobalyq-smetalyq qujattama ázirleýge bıýdjetten qarjy bólindi. Bıylǵy jyly jastar bastamalaryn qoldaý men olardyń shyǵarmashylyǵyn arttyrýǵa baǵyttalǵan áleýmettik jobalarǵa qaralǵan qarjy kólemi 34 paıyzǵa artty. Bul baǵyttaǵy qarjyǵa jastar qoǵamdyq uıymdary byltyr 37 joba júzege asyrsa, bıyl olardyń sany 49-ǵa jetti. Sonymen qatar, Elbasynyń tapsyrmasyna sáıkes stýdent jastardy 2022 jylǵa deıin jataqhanamen qamtamasyz etý boıynsha memlekettik-jekeshelik áriptestik aıasynda bıyl 330 orynǵa arnalǵan Qyzylorda medıtsına joǵary kolledjiniń jataqhana qurylysy aıaqtalady. Ol jeltoqsan aıynda paıdalanýǵa beriletin bolady», - dedi oblys ákimi Q. Ysqaqov.
