Qyzylordada Syr óńiri tarıhyna arnalǵan kitaptar jaryqqa shyqty

QYZYLORDA. QazAqparat – Qyzylordada Tuńǵysh Prezıdent – Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda «Qasıetti Qazaqstan», «Syr boıynyń saraldy eskertkishteri: mıfter, ańyzdar, hıkaıattar» jáne «Alashtyń asyl murasy» kitaptarynyń tusaýkeseri ótkizildi, dep habarlaıdy QazAqparat tilshisi.

Atalmysh kitaptar elimizde júzege asyp jatqan «Qazaqstannyń kıeli jerleriniń geografııasy» jobasy aıasynda júzege asty. «Qasıetti Qazaqstan» entsıklopedııasynyń ekinshi tomyna Syr óńirindegi saq, oǵyz, qańly taıpalary jáne qypshaq memleketiniń strategııalyq mańyzdy qalalary men sáýlet óneriniń eskertkishteri, áleýmettik-saıası ómirinde mańyzdy oryn alatyn kıeli nysandar men keshender engizilgen. Olardyń 12-i jalpyulttyq, 72-i óńirlik qasıetti nysandar.

Al «Syr boıynyń sakraldy eskertkishteri: mıfter, ańyzdar, hıkaıattar» kitabynda da óńirdegi tarıhı derekter qamtylǵan. Bul ıgi bastama elimiz boıynsha tuńǵysh ret Qyzylorda oblysynda qolǵa alynyp otyr. Ony jergilikti ǵalymdar jınaqtaǵan. Onda Syr boıynyń kıeli jer-sý ataýlary, kóne qalalar jáne tarıhı oryndar jaıly qundy málimetter bar.

Tarıhı tanymdaǵy taǵy bir dúnıe - «Qasıetti Qazaqstan» kitabynda Syr súleıi Turmaǵambet Іztileýovtiń el arasynan jınaqtalǵan ádebıet úlgileri, kóne arab álipbıinde hatqa túsirgen shyǵarmalary, alash qalamgerleriniń HH ǵasyr basynda Tashkentte jaryq kórgen rýhanı baǵaly qazynasy sanalǵan shyǵarmalary toptastyrylǵan. Sondaı-aq, antologııalyq jınaqqa Mahambet Ótemisuly, Ahmet Baıtursynuly, M.Dýlatuly jáne ózge de alash qalamgerleriniń muralary engizilgen. Ony jınaqtaýǵa fılologııa ǵylymdarynyń kandıdaty, túrkitanýshy ǵalym Serikbaı Qosan úlken eńbek sińirdi.

«Bul dúnıeler Syr óńiri ádebıeti men mádenıeti, rýhanııatyna úles qosatyn aıryqsha dúnıeler dep sanaımyz. Osylaısha óskeleń urpaqqa týǵan jerdiń tarıhyn tanýǵa jola ashylady», - dedi oblys ákiminiń orynbasary Naýryzbaı Baıqadamov.