Qyzylordada «Syr Ana» monýmenti qaıta jańǵyrtyldy
Merekelik baǵdarlama aıasynda oblys ákimi Gúlshara Ábdiqalyqova men qala ákimi Nurlybek Nálibaev qaıta jańǵyrtýdan ótken «Syr Ana» monýmentine bardy.
Aımaq basshysy qaıta jańǵyrtý jumystarynyń nátıjesimen tanysty, qala turǵyndaryna arnaıy quttyqtaý sózin joldady.
«Bıyl Qyzylorda qalasynyń 202 jyldyǵyn atap ótýdemiz. Oblys ortalyǵy kúnnen kúnge kórkeıip keledi. Demografııalyq ósýmen qatar qalanyń aýmaǵy da keńeıe tústi. Jańadan shaǵyn aýdandar boı kóterdi. Syrdarııa ózeniniń sol jaǵalaýy da qarqyndy damyp keledi» - dedi oblys ákimi.
Monýment aýmaǵy «Jumyspen qamtý jol kartasyna» saı jańǵyrtýdan ótken. Munda 3 myńnan asa sharshy metr jer kógaldandyrylǵan. Aǵash kóshetteri egilip, kógal tóseldi. Monýment mańyndaǵy jaıaý júrginshiler joly jańartylyp, 2 sporttyq oıyn alańy salynǵan. Zamanaýı úlgidegi 2 sýburqaq el ıgiligine berildi. 2012 jyly boı kótergen ásem ǵımarat ajary osylaısha aıshyqtala tústi. Keshen qala turǵyndary men qonaqtarynyń jıi baratyn demalys ornyna aınaldy.
Qala kúninde balalar oıyn alańy da paıdalanýǵa berildi. Bul oryn Panfılov kóshesi boıynda ornalasqan. Munda sporttyq jattyǵýǵa arnalǵan qural-jabdyqtar men fýtbol alańy salynǵan. Óz kezeginde kópbalaly ana Tamasha Ábilqasymova turǵyndar atynan alǵys aıtty. Osylaısha balalardyń ýaqytyn tıimdi ári qaýipsiz ótkizýge múmkindik jasaldy.
Aıta keteıik, bıyl qalada 3 orynǵa strıtbol, sporttyq jattyǵý alańy men kóppáterli úılerdiń aýlasyna 30 oıyn alańyn salý josparlanǵan. Qazir olardyń qurylysy tolyǵymen aıaqtaldy. paıdalanýǵa berildi. Sondaı-aq, qala boıynsha 60-tan asa oıyn alańyna jóndeý jumystary júrgizilip jatyr.
Sondaı-aq, Qyzylorda qalasyna qarasty aýyldarda birqatar áleýmettik máseleler sheshildi.