Qyzylordada «Syr - Alashtyń anasy» atty tarıhı kitaptyń tusaýy kesildi
Saltanatty sharaǵa oblys ákiminiń orynbasary, redaktsııalyq alqa tóraǵasy Serik Ahmet, oblystyq máslıhattyń hatshysy, tarıh ǵylymdarynyń kandıdaty Naýryzbaı Baıqadamov, tehnıka ǵylymdarynyń doktory, professor, QR UǴA akademıgi Qylyshbaı Bısenov, Qorqyt Ata atyndaǵy Qyzylorda ýnıversıtetiniń «Qorqyttaný» ǵylymı ortalyǵynyń jetekshisi, fılologııa ǵylymdarynyń doktory, professor Baǵdat Káribozuly, «Rýhanı jańǵyrý» ortalyǵynyń dırektory, tarıh ǵylymdarynyń kandıdaty Ýálıhan Ibraev jáne ardagerler men ustazdar qatysty.
Kitapta aımaqtyń erte dáýirden bastap búgingi kúnge deıingi tarıhy, ekonomıkasy, qoǵamdyq-saıası jáne rýhanı-mádenı ómirindegi qol jetkizgen tabystary men jetistikteri jaıyndaǵy málimetter úsh tilde ázirlengen. Kirispesi Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń, Memleket basshysy Qasym-Jomart Toqaevtyń jáne osy kitaptyń ıdeıa avtory, oblys ákimi Gúlshara Ábdiqalyqovanyń quttyqtaýymen bastalady.
«Syr - Alashtyń anasy» kitaby logıkalyq turǵydan tizbektelgen birneshe bólimnen, ıaǵnı, oblys týraly jalpy aqparat, óńir tarıhyna arnalǵan, oblystyń ekonomıkalyq áleýeti, «Syr eli - jyr eli», áleýmettik salaǵa arnalǵan, «Rýhanı jańǵyrý» bólimderinen turady. Sonymen qatar, Qyzylorda, Baıqońyr qalalary men aýdandardaǵy sony serpilis, údemeli ekonomıkalyq damýy men qoǵamdyq-mádenı ómirdegi ózekti aqparattar berilgen.
Kitaptyń tusaýkeser rásimin oblys ákiminiń orynbasary, redaktsııalyq alqa tóraǵasy Serik Ábjáliuly Ahmet ashty. Jınaqtyń mazmuny men kórkemdik-ıdeıalyq ereksheligine keńinen toqtalyp, bul kitap Syr eliniń Táýelsizdikke degen tartýy bolmaq dedi.
«Barshańyzdy Táýelsizdiktiń 30 jyldyq mereıtoı aıasynda oqyrmanǵa jol tartqan jańa kitaptyń jaryqqa shyǵýymen quttyqtaımyn. Redaktsııalyq alqamen oılasa kele kitapty «Syr - Alashtyń anasy» dep ataýymyzdyń úlken sımvoldyq máni bar. Halqymyzdyń san ǵasyrlyq tarıhynda Syr ózeniniń boıy uly órkenıetterdiń oshaǵy bolyp qana qoımaı, barsha dala halqyna qınalǵanda pana, súringende súıenish bolǵany tarıhtan belgili. Bul sóz búginde tek oblys halqyna ǵana emes, barsha qazaqstandyqtarǵa jáne alys-jaqyn sheteldik qonaqtarymyzǵa da tanys dep aıtsaq qatelespeımiz. Al, syrtqy muqabasynyń túsin de kezdeısoq tańdaǵan joqpyz. Syr topyraǵynyń túsimen úılesim tabýynyń ózi tarıhtan tamyr tartqan týyndy ekenin dáleldeıdi. Al, Qorqyt ata eskertkishin beıneleý arqyly óńirimizdiń tarıhy óte tereńde ekenin jáne Syr eliniń jyr eli ekenin uǵyndyrýdy jón sanadyq. Syr eliniń tarıhyna qanyqqysy kelgen árbir oqyrman bul eńbekten kóp dúnıeni saralaı alady degen oıdamyn», - dedi oblys ákiminiń orynbasary.
Keleli basqosýda oblystyq máslıhattyń hatshysy, tarıh ǵylymdarynyń kandıdaty Naýryzbaı Baıqadamov irgeli izdenisterge qurylǵan jańa kitap oqyrmanǵa oljaly syı bolǵaly turǵanyn qaperge saldy. Al, tehnıka ǵylymdarynyń doktory, professor, QR UǴA akademıgi Qylyshbaı Bısenov bul kitap tutas Syr eliniń damý dınamıkasyn aıshyqtap beretin qundy muraǵa aınalatynyn atap ótti. Sondaı-aq, Qorqyt Ata atyndaǵy Qyzylorda ýnıversıtetiniń «Qorqyttaný» ǵylymı ortalyǵynyń jetekshisi, fılologııa ǵylymdarynyń doktory, professor Baǵdat Káribozuly bul kitaptyń tyń tarıhı derekterge negizdelip, buryn-sondy jaryq kórmegen aqparattarmen tolyqtyrylyp shyǵýy úlken izdenisten týǵan eńbek dep joǵary baǵasyn berdi.
Alqaly otyrysta «Rýhanı jańǵyrý» ortalyǵynyń dırektory, tarıh ǵylymdarynyń kandıdaty Ýálıhan Ibraev kitaptyń kıeli jerler geografııasyna negizdelgen tarıhı oryndar men ańyz bolyp jetken oqıǵalarǵa súıenip jazylýynyń ózindik máni joǵary ekenin maqtanyshpen jetkizdi.
Jıynda jańa kitaptyń tusaýy kesilip, qalyń kópshilikke jol tartty. Jaryqqa shyqqan kitaptar óńirdiń barlyq kitaphanalaryna taratylatyn bolady.
Aıta ketý kerek, tarıhı jınaq aımaqtyń turmysyn, rýhanı-mádenı damý belesterin saralaý, qazyna-jaýharlarymyzdy belsendi nasıhattaýǵa úndeıdi. Bul qoǵamdy adamnyń jańa kelbetin qalyptastyrýda óńirde júzege asyp jatqan «Syr eli» mega jobasynyń ajyramas bóliginiń biri bolmaq.
