Qyzylordada sýǵa ketken er adamnyń denesi 3 kúnnen keıin tabyldy
QYZYLORDA. QazAqparat - Qyzylorda oblysynda kanalǵa sýǵa batyp ketken eki adamnyń biri 33 jastaǵy er adamnyń denesi úsh kúnnen keıin tabyldy, dep habarlaıdy QazAqparat tilshisi.
Eske salsaq, oqıǵa Jańaqorǵan aýdanyna qarasty Kóktóbe aýyly aýmaǵyndaǵy Kelintóbe kanalynda 27 maýsymda bolǵan. Sol kúni saǵat 14.12-de Shymkent qalasynda turatyn 1988 jylǵy er azamat pen Túrkistan qalasynyń turǵyny, 2008 jylǵy qyz bala sýǵa batyp ketken.
Tótenshe jaǵdaılar salasynyń mamandary 13 jastaǵy jasóspirimniń denesin 29 maýsymda Qandóz aýylynda kópirge 50 metr jetpeıtin aýmaqtan tapqan bolatyn.
Al er azamattyń denesin izdestirý odan ári jalǵasqan edi.
«Búgin, tańerteń tótenshe jaǵdaılar salasynyń mamandary onyń denesin sýǵa túsken aýmaǵynan 3 shaqyrym qashyqtyqtan tapty», - dedi oblystyq tótenshe jaǵdaılar departamenti.
