Qyzylordada sý, jylý jáne elektr energııasy baǵasynyń tarıfteri ózgermeıdi

QYZYLORDA. QazAqparat - Ótken jyly Tabıǵı monopolııalardy retteý jáne básekelestikti qorǵaý departamentimen tarıfterdi bekitý boıynsha ótinimderdi qaraýdan bolǵan ekonomıkalyq tıimdilik somasy 2,3 mlrd. teńgeni quraǵan.

Bul týraly búgin Óńirlik kommýnıkatsııalar qyzmetinde ótken baspasóz máslıhatynda Qyzylorda oblysy boıynsha Tabıǵı monopolııalardy retteý jáne básekelestikti qorǵaý departamentiniń N. Pirimov aıtty, dep habarlady QazAqparat HAA tilshisi.  

Sonymen qatar, departamentpen 2016 jyly tarıftik smetalardyń jáne ınvestıtsııalardyń oryndalýyn taldaý qorytyndysy boıynsha 23 tabıǵı monopolııa sýbektilerine 42 ýaqytsha ótemdik tarıfter engizilip, 967,8 mln. teńge tutynýshylar qorjynynda qalǵan.

N. Pirimovtiń sózine qaraǵanda, 2016 jyly Tabıǵı monopolııalardy retteý jáne básekelestikti qorǵaý departamentine 34 tabıǵı monopolııa sýbektilerinen tarıfterdi qaraýǵa ótinimder túsip, onyń ishinde: 22 sýbektige usynylǵan qujattardyń qoldanystaǵy normatıvtik-quqyqtyq aktilerdiń talabyna sáıkes kelmeýine baılanysty qaraýdan bas tartylsa, 5 sýbekti ótinimderin qaıtaryp alǵan jáne
7 sýbektiniń tarıfteri bekitildi. «Sonymen qatar, 2015 jyly «Qyzylordajylýelektrortalyǵy» MKK, «QETTK» AQ jáne «Qyzylorda sý júıesi» MKK-nyń tarıfteri uzaq merzimdi 5 jyldyq kezeńge bekitildi. Osynyń nátıjesinde sý, jylý jáne elektr energııasy baǵasynyń tarıfteri ózgermeıdi», - dedi departament basshysy.