Qyzylordada sý tasqynyna qarsy atqarylǵan jumystar qorytyndylandy
QYZYLORDA. QazAqparat- Búgin Qyzylordada oblys ákimi Qyrymbek Kósherbaevtyń tóraǵalyǵymen sý tasqynyna qarsy is sharalardyń qorytyndysyna arnalǵan jıyn ótti,-dep habarlady QazAqparat HAA tilshisi.
Jıyndy asha otyryp, oblys ákimi sý tasqyny kezinde jaýapty tulǵalardyń uıymdasqan jumystarynyń nátıjesinde kisi ólimine jol berilmegenin jáne turǵyn úılerge nuqsan kelmegenin atap ótti. Qutqarý jumystary kezinde erekshe kózge túsken 5 adam úkimettik nagradalarǵa usynyldy. Taǵy 19 adam oblys ákiminiń alǵys hattarymen marapattaldy.
Degenmen, Qazaly jáne Qarmaqshy aýdandarynda sý tasqyny kezinde mal shyǵyny boldy. Osy jaǵdaıdy eskere otyryp, oblys ákimi Kósherbaev aldaǵy ýaqytta tek qana eskertýler men paraqshalar taratýmen shektelmeı, mindetti túrde sý basý aımaǵynan maldardy shyǵarýdy tapsyrdy.
«Mal óliminiń oryn alýy birinshiden sharýashylyq qojalyqtaryna, ekinshiden aımaq ekonomıkasyna shyǵyn ákelip otyr. Aldaǵy ýaqytta osyndaı shyǵyndardyń bolmaýyn basty nazarda ustap, aldyn alý sharalaryn turaqty túrde júrgizýimiz qajet»,-dedi Kósherbaev.
Quzyrly mekemelerdiń basshylary ózendegi jaǵdaı týraly baıandady. Oblys ákimi qazir seń oblys aýmaǵynan ótkenimen, tasqyn qaýpi áli de bar ekenin atap ótti.
Kósherbaev keleńsiz jaǵdaılardyń aldyn alý boıynsha birqatar naqty tapsyrmalar berdi.
