Qyzylordada sý resýrstaryn paıdalaný máseleleri talqylandy
QYZYLORDA. QazAqparat - Qyzylorda qalasynda Memleketaralyq úılestirýshi sý sharýashylyǵy komıssııasynyń 73-shi otyrysy ótti. Onda sý resýrstaryn paıdalaný jáne qorǵaý máseleleri talqylandy, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Halyqaralyq is-sharaǵa Ózbekstan Respýblıkasynyń sý sharýashylyǵy mınıstri Shavkat Hamraev, Qazaqstan Respýblıkasy aýyl sharýashylyǵy vıtse-mınıstri Erlan Nysanbaev, Tájikstan Respýblıkasynyń energetıka jáne sý resýrstary mınıstriniń birinshi orynbasary Sýlton Rahımzoda jáne Túrikmenstan sý jáne aýyl sharýashylyǵy mınıstriniń orynbasary Magtymgýly Baıramdýrdyev qatysty.
Komıssııa otyrysynda 2017-2018 jyldardaǵy Syrdarııa men Ámýdarııa basseınderindegi vegetatsııaaralyq kezeń qorytyndysy talqylandy. 2018 jylǵy vegetatsııalyq kezeńde sý alý lımıtteri men sý qoımalarynyń jumys kestesi bekitildi. Sondaı-aq, «Aral teńizi basseıniniń sý resýrstaryn keshendi basqarý paıdalaný jáne qorǵaýyna aqparattyq-taldaý qamtamasyz etý jáne Qazaqstan, Qyrǵyzstan, Tájikstan, Túrikmenstan men Ózbekstan arasyndaǵy aqparat almasýdy uıymdastyrý jóninde» kelisim jobasy bekitildi. Odan bólek, qatysýshylar memleketaralyq komıssııanyń jumysyn odan ári kúsheıtý máselelerin talqylap, komıssııanyń 74-shi otyrysyn ótkizý baǵdarlamasy men ornyn kelisti.
Tústen keıin olar Qyzylorda oblysynyń ákimi Qyrymbek Kósherbaevpen kezdesti. Júzdesý barysynda aımaq basshysy komıssııa jumysynyń kórshi memleketter arasynda sý sharýashylyǵy máselelerin retteýdegi mańyzdylyǵyn atap ótti.
Esterińizge sala keteıik, bıyl Halyqaralyq Aral teńizin qutqarý qorynyń qurylǵanyna 25 jyl boldy. 1993 jyldyń 25 naýryzy kúni Qazaqstan men Ortalyq Azııa memleketteri basshylarynyń Qyzylorda qalasynda ótken sammıtinde atalmysh qordy qurý jóninde sheshim qabyldanǵan. Al Ortalyq Azııa elderiniń sý resýrstaryn birlese basqarý jónindegi áriptestigine bıyl týra ǵasyr tolyp otyr. Tarıh derekterine súıensek, 17 maýsym kúni «Túrkvodhoz» buryn quramynda komıssııa músheleri bolǵan Túrkistan respýblıkasynyń sý sharýashylyǵy basqarmasynyń qurylýyna 100 jyl boldy.
«Aral teńizi máselesi jeke bir aımaq nemese eldiń sheńberinen shyǵyp, búkilálemdik deńgeıdegi kúrdeli máselege aınaldy. Jaǵdaıdy jaqsartý úshin sý resýrstaryn tıimdi paıdalanyp, sý alý lımıtterin saqtaý boıynsha jumysty ári qaraı kúsheıtý kerek. Osy máseleler 15 naýryz kúni Astana qalasynda Memleket basshylardyń kezdesýinde talqylanǵan bolatyn. Al tamyz aıynda Túrikmenstan astanasy - Ashhabadta Halyqaralyq Aral teńizin qutqarý qoryna qatysýshy elder memleket basshylary keńesiniń otyrysy josparlanýda»,- dep atap ótti oblys ákimi. Memleket basshylarynyń otyrysyna oraı komıssııa jumysyn ári qaraı jetildirý boıynsha usynystar ázirlenetin boldy.
Kezdesýge qatysýshylar komıssııa otyrysynyń joǵary deńgeıde uıymdastyrylǵanyn jáne onyń jumysyna barynsha yqpaldastyq jasalǵanyn atap ótti. Máselen, Ózbekstan Respýblıkasynyń Sý resýrstary mınıstri Shavkat Hamraev: «Sýdy paıdalaný máseleleri Ortalyq Azııa elderi úshin asa mańyzdy. Sondyqtan biz óz tarapymyzdan osy salada áriptestik qarym-qatynas ornatýǵa daıynbyz», - dedi.
Memleketaralyq komıssııanyń 74 otyrysy Ashhabad qalasynda ústimizdegi jyldyń qyrkúıek aıynda ótkiziledi dep josparlanyp otyr.
Aıta ketelik, memleketaralyq úılestirýshi sý sharýashylyǵy komıssııasy 1992 jyly Ortalyq Azııa elderiniń Aral teńizi basseınindegi sý sharýashylyǵy máseleleri boıynsha sheshim qabyldaý alańy retinde qurylǵan bolatyn.
Ádiljan Úmbet
