Qyzylordada sý betinde qımylsyz jatqan áıel qutqaryldy
Oqıǵa jergilikti ýaqytpen 15.00 shamasynda darııanyń sol jaǵalaý aýmaǵynda tirkelgen. Bul ýaqytta tótenshe jaǵdaılar salasynyń mamandary atalǵan aýmaqta azamattarǵa sýdaǵy qaýipsizdik sharalary taqyrybynda túsindirme jumystaryn atqaryp júrgen bolatyn. Mamandar darııa ústinen sol jaǵalaýǵa ótetin kópirdiń arǵy bóliginde sý betinde belgisiz áıeldiń qımylsyz jatqanyn baıqap qalady.
«Mamandar ony qutqarýǵa umtyldy. Osyndaı jedel árekettiń nátıjesinde darııa betinde qalqyp júrgen áıel jaǵaǵa shyǵaryldy. Ony qutqarýǵa oblystyq tótenshe jaǵdaılar departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń aǵa ınjeneri Beksultan Bıjigit, volonter Aqbaıan Búrkitbaı men sol aýmaqta balyq aýlap júrgen qala turǵyny Dastan Qadyrov kómektesti. Áıel sý jutqany, spırttik ishimdik ishkeni belgili boldy», - deıdi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń ókilderi.
Sondaı-aq, Qyzylorda oblysynda sýǵa batyp ketken 13 jastaǵy qyz izdestirilip jatyr.