Qyzylordada sý aıdyndarynan 50 tonnadaı qoqys, myńnan asa aý shyǵaryldy
QYZYLORDA. QazAqparat - Syr óńirindegi barlyq sý aıdyndary men Kishi Aral teńizinde qyzmettik katerler, motorly qaıyqtarymen sý ishindegi aý qaldyqtary jınalyp shyǵaryldy. Sondaı-aq, balyq sharýashylyǵy sý aıdyndarynyń jaǵalaýlaryn qoqystardan tazartý jumystary júrgizildi, dep habarlaıdy QazAqparat tilshisi.
«Mundaı shara mamyr aıynda oblys aýmaǵynda «Taza sý aıdyndary» atty tabıǵatty qorǵaý aktsııasy aıasynda ótkizildi. Sý aıdyndaryn turmystyq qaldyqtardan tazalaý - basty maqsatymyz. Taza sý - densaýlyq kepili, tirshilik kózi, oblys kólemindegi sý aıdyndary taza bolsa, densaýlyǵymyz da jaqsy bolady. Balyq pen basqa da sý janýarlarynyń qory kóbeıedi», - dedi Qyzylorda oblystyq orman sharýashylyǵy jáne janýarlar dúnıesi aýmaqtyq ınspektsııasy basshysynyń orynbasary Marat Nurmaǵambetov.
Bul sharaǵa aýyl turǵyndary, stýdentter, oqýshylar qatysty. Nátıjesinde 48,5 tonnaǵa jýyq ár túrli turmystyq qoqystar men 1011 aý-quraldardyń qaldyqtary jınalyp, tıisti oryndarǵa shyǵaryldy.
