Qyzylordada sottalǵandardyń 75 paıyzy jumyspen qamtylǵan
QYZYLORDA. QazAqparat-Qyzylorda oblysynyń óńirlik kommýnıkatsııalar qyzmetinde aımaq boıynsha Qylmystyq-atqarý júıesi departamentiniń bastyǵy Ǵanıbek Otarbaevtyń BAQ ókilderine arnalǵan brıfıngi ótti, dep habarlaıdy QazAqparat.
Departament bastyǵynyń aıtýynsha, úkimettik emes uıymdar men qoǵamdyq baıqaý komıssııasy sottalǵandardy adamgershilik baǵytta tárbıeleý jáne bostandyqqa shyqqan soń túrli jat qylyqtardan aýlaq etý maqsatynda 10 dáris ótkizgen.
Nátıjesinde, mekemelerde sottalýshylardyń ishki tártip erejesin buzýynyń jalpy sany 22 paıyzǵa azaıdy, ıaǵnı 1 myń adamǵa shaqqandaǵy buzýshylyq ótken jylmen salystyrǵanda 85-ten 61-ge tómendep otyr.
Qatań rejimdegi túzeý mekemelerinde orta bilimi joq sottalǵandarǵa arnalǵan jalpy bilim beretin mektepter jumys jasaıdy. Kórsetilgen mektepterde bilim alý qazaq jáne orys tilderinde júrgiziledi. 2015-2016 oqý jylynyń IV toqsanynda bilim alýshy sottalǵandardyń jalpy sany 42, onyń ishinde memlekettik tilde bilim alýshylar - 24-ti qurady.
Qazirgi ýaqytta Qyzylordada túzetý mekemelerine kásipkerlerdi kóptep tartýdyń arqasynda eńbekke umtylýshylar sany artyp otyr. Máselen, oblys ortalyǵyndaǵy ZK-169/4 mekemesinde jazalaryn ótep jatqan 50-ge jýyq sottalýshynyń deni kirpish zaýytynda ter tógedi.
Jergilikti bılik organdary men bıznes qurylymdary birlesip atqarǵan jumystar nátıjesinde qazirgi ýaqytta oblys boıynsha sottalǵandardy jumyspen qamtý kórsetkishi 75,1 paıyzdy qurady.
Barlyǵy 10 kásipker túzeý mekemesiniń óndiristik aımaǵynan óz bıznesterin ashyp (kirpish zaýty, tigin tsehy, gazoblok tsehy, brýschatka, músin tsehy, qolóner tsehtary, dánekerleý tsehtary jáne qoıan asyraý). Onda 9 aıda ortasha eseppen 196 sottalǵan jumysqa ornalastyryldy. 5 sottalǵan jeke eńbek qyzmetimen aınalysýda.
Aldaǵy ýaqytta, sottalǵandar tarapynan jasalýy múmkin tótenshe jaǵdaılardyń aldyn alý maqsatynda, tolyq jumysqa tartý úshin ZK-169/5 mekemesiniń óndiristik aımaǵyna tabıǵı gaz kirgizip, qosymsha kirpish kúıdirý, ák jáne sabyn shyǵarý tsehtaryn ashý josparlanýda.
Oblystyq prokýratýramen birlesip uıymdastyrylǵan «Túrmedegilerdiń sanyn azaıtýdyń 10 is-sharasy», «Sottalǵandardy jumyspen qamtý-2017», Qaıta áleýmettendirý: «Sen qoǵamǵa kereksiń» túrme reformalary aıasynda óńirlik forým ótkizildi. Forýmǵa jergilikti atqarýshy organdar, úkimettik emes uıymdar jáne oblystaǵy kásipkerlik sýbektileri qatysty. Forým aıasynda sottalǵandardyń qoldarynan shyqqan ónimder kórmesi usynyldy.
Qaıta daıarlaý sheńberinde qaýipsizdigi barynsha joǵary ZK-169/5 mekemesinde jazasyn óteıtin sottalǵandarǵa tehnıkalyq jáne kásiptik bilim berý jumystary jolǵa qoıylǵan. Jergilikti bıýdjet esebinen mamandardy daıarlaý úshin Qyzylorda polıtehnıkalyq kolledji men Qyzylorda qurylys jáne bıznes kolledjimen kelisim shart jasaldy. Osylaısha, jazalaryn óteýshi 50 adam «gazben jáne elektrmen pisirýshi» jáne «aǵash ustasy» mamandyqtary boıynsha bilim alýda.
