Qyzylordada sottalǵan 50 azamat kolledjderge oqýǵa qabyldandy
QYZYLORDA. QazAqparat - Qyzylorda oblysy boıynsha QAJ departamentiniń ZK-169/5 mekemesinde jazasyn óteýshi sottalǵandarǵa jalpy orta bilim berilýde.
Bul týraly ZK-169/5 mekemesiniń memlekettik tilde is-júrgizýshisi A.Ábdiráshıtova habarlady.
Qazaqstan Respýblıkasy Konstıtýtsııasynyń 30-baby, 1-tarmaǵyna sáıkes memleket ár azamatqa tegin orta bilim alýǵa kepildik beredi jáne árbir azamat bilim alýǵa mindetti dep aıqyn kórsetilgen.
Osy oraıda, ZK-169/5 mekemesinde jaza óteýshi azamattardyń tıisinshe bilim alýyna basa nazar aýdarylǵan. Orta bilim berý baǵdarlamasy 9-synyp jáne 12-synyptyq júıede qalalyq jalpy bilim beretin keshki mektep ustazdary oqytady. Sonymen qatar, Qyzylorda polıtehnıkalyq kolledjine «dánekerleýshi» mamandyǵy boıynsha 25 sottalǵan azamat jáne Qurylys jáne bıznes kolledjine «aǵash ustasy» mamandyǵyna 25 sottalǵan azamat qabyldandy.
Búgin mekeme bastyǵy, ádilet maıory T.Qalymbetovtyń basshylyǵymen jazasyn óteýshi sottalǵandar arasynda jańa oqý jylynyń bastalýyna baılanysty jalpy bilim alýshylarǵa arnalǵan saltanatty shara atalyp ótildi. Mekeme basshylyǵy 1 qyrkúıek bilim kúnimen quttyqtap, bilim alýǵa nıet bildirgen azamattarǵa sáttilik tiledi. Bul shara «Qoǵamdyq baqylaý komıssııasy» tóraǵasynyń orynbasary M.Balǵaraev jáne keshki mektep dırektorynyń oqý isi jónindegi orynbasary T.Násipbekovtiń qatysýymen júrgizildi.
