Qyzylordada sora ósirýmen aınalysqan 3 azamat ustaldy
QYZYLORDA. QazAqparat - Respýblıka aýmaǵynda júrgizilip jatyrǵan «Kóknar» jedel-profılaktıkalyq sharasy barysynda qyzylordalyq polıtseıler Ulttyq Ulannyń jáne Esirtki bıznesine qarsy kúres departamentiniń qyzmetkerlerimen birigip Karmaqshy aýdany, Qýańdarııa aýyldyq okrýginen 8 km qashyqtyqta esirtki zaty ósip turǵan alqapty anyqtady. Bul týraly QazAqparat tilshisi oblystyq ІІD silteme jasap habarlady.
Jýyrda ósirýge zańmen tyıym salynǵan 2305 túp sora ósimdigin kútip-baptap jatyrǵan jerinen 37 jastaǵy, 34 jastaǵy jáne 33 jastaǵy úsh qala turǵyny ustaldy. Tekserý barysynda, atalǵan ósimdiktiń jalpy salmaǵy 461 kg qurady.
Sonymen qatar, atalǵan aýmaqtan ydys-aıaqtar, esirtki zatyn ósirýge jáne tutynýǵa arnalǵan qural-saımandar men ózine tán ıisi bar jasyl tústi zattek salynǵan 2 qap anyqtaldy. Anyqtalǵan shóptektes zatqa saraptama taǵaıyndalyp, nátıjesinde onyń «keptirilgen marıhýana» ekendigi belgili boldy.
Qazirgi tańda atalǵan úsh azamattyń ústinen Qazaqstan Respýblıkasy Qylmystyq Kodeksiniń 300-baby 2-bóligi jáne 296-baby 4-bóligi boıynsha qylmystyq is qozǵalyp, sotqa deıingi tergep-tekserý amaldary júrgizilýde. Úsh azamat ta Qarmaqshy aýdandyq ishki ister bóliminiń Ýaqytsha ustaý abaqtysyna qamaýǵa alyndy.
