Qyzylordada sońǵy jyldarda munaı óndirý tómendegen

QYZYLORDA. QazAqparat - Bıyl Qyzylorda oblysynda munaı 1 mln tonnaǵa kem óndiriledi dep boljanyp otyr. Sońǵy bes jylda Syr óńirinde munaı óndirý jyldan-jylǵa tómendep keledi, dep habarlaıdy QazAqparat tilshisi.

Qyzylorda oblysynyń ákimi Qyrymbek Kósherbaev búgingi halyq aldyndaǵy esepti kezdesýinde osy jóninde aıtyp berdi. 2013 jyldan bastap ındýstrııalandyrý arqyly ekonomıkany ártaraptandyrý máselesine nazar aýdarylyp otyr.

«Sońǵy 6 jylda aımaqta munaı óndirý 10,7 mln tonnadan 6,4 mln tonnaǵa deıin azaıdy. Tek 2018 jyldyń ózinde munaıdyń 420 myń tonnasyn joǵalttyq. Bıyl boljam boıynsha munaı taǵy 1 mln tonna kem óndirilmek. Barlyq ónerkásip ekonomıkanyń barlyq salasyna tikeleı nemese janama áser etetini belgili. Sondyqtan Memleket basshysy naqtylaǵandaı, biz 2013 jyldan bastap ındýstrııalandyrý arqyly ekonomıkany ártaraptandyrýdy aldymyzǵa basty mindet etip qoıdyq», - dedi Qyrymbek Kósherbaev.

Degenmen soǵan qaramastan sońǵy 4 jylda alǵash ret 2017 jyly Qyzylorda oblysy jalpy óńirlik ónimniń kórsetkishi boıynsha 2016 jylǵy deńgeıden 100,8 paıyzǵa kóterildi.

Eske sala ketsek, Qyzylordada zamanaýı et kombınaty salynatyn boldy.