Qyzylordada sońǵy tirkelgen 8 adam koronavırýs ınfektsııasyn qaıdan juqtyrdy

QYZYLORDA. QazAqparat - 9 sáýirde Qyzylorda oblysynda koronavırýs ınfektsııasy dıagnozy qoıylǵan sońǵy segiz naýqastyń ony qaıdan juqtyrǵany belgili boldy, dep habarlaıdy QazAqparat tilshisi.

Olardyń altaýy Syrdarııa aýdanynan tirkelse, ekeýi Qyzylorda qalasynda turady. Jas shamasy boıynsha eń úlkeni 1970 jyly dúnıege kelgen er adam bolsa, eń jasy 2002 jylǵy qyz bala. Barlyǵy budan buryn koronavırýs ınfektsııasymen aýyrǵan adammen qarym-qatynasta bolǵan.

«Qazir oblysta atalǵan dıagnoz qoıylǵan 100 adam bar. Aýrý oshaqtarynda dezınfektsııalyq jumystar júrgizilip jatyr. Qarym-qatynasta bolǵan adamdar anyqtalýda. Búgingi kúnge deıin júrgizilgen epıdzertteý nátıjesi boıynsha naýqastarmen baılanysta bolǵan 1174 azamat anyqtaldy. Onyń ishinde tyǵyz qarym-qatynasta bolǵandar sany – 585, yqtımal qarym-qatynasta bolǵandar sany – 589 adam. Statsıonarlarda medıtsınalyq baqylaýǵa 545 adam alyndy, úı jaǵdaıyndaǵy baqylaýdaǵylardyń sany – 629 adam», - dep málim etti Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamenti.

9 sáýirdegi jaǵdaı boıynsha aımaqta koronavırýs ınfektsııasyna shaldyqqan 100 adam anyqtaldy. Onyń ishinde Qyzylorda qalasynda – 12 jaǵdaı tirkelse, aýdandar boıynsha Jańaqorǵanda -16, Qarmaqshyda – 4, Shıelide – 52, Syrdarııada - 14, Aralda – 2 jaǵdaı oryn aldy.

Budan buryn Qyzylorda oblysynda koronavırýs juqtyrǵan júkti áıel aman-esen bosanǵandyǵy habarlandy.