Qyzylordada sońǵy bir aptada 144 adam koronavırýs juqtyrǵan
Oblysta bıylǵy jyldyń 28 naýryzy men 3 maýsymǵa aralyǵynda koronavırýs ınfektsııasynyń 449 deregi anyqtaldy. Onyń 220 jaǵdaıy nemese 49% tótenshe jaǵdaı alynǵannan keıingi bir aıǵa tolmaıtyn ýaqytta tirkelip otyr.
Al 27 mamyr-2 maýsym aralyǵynda aýrý sany eń joǵary kórsetkishke jetip, bir aptada 144 jaǵdaı tirkeldi.
«Bir oshaqtan 56-60 aýrý jaǵdaıy tirkelgen derekter kezdesti. Mundaı ósim kórsetkishi sanıtarııalyq talaptardyń saqtalmaý saldarynan tirkelýde. Sońǵy kúnderde oblysta tótenshe jaǵdaı alynyp, karantın talaptary jeńildetildi. Halyqtyń tynys-tirshiligine qajetti salalar men nysandar kezeń-kezeńimen iske qosyldy.
Jaz mezgiliniń aptap ystyǵynda halyqty shekteýde ustaý múmkin emes. Degenmen shydamdylyq tanytyp oqshaýlanýdyń qarapaıym erejelerin epıdemıologııalyq ahýal turaqtanǵansha ustaǵanymyz jón. Búgingi kúrdeli epıdemıologııalyq ahýal áli de bolsa merekelik sharalardy, jıyn-toılardy, oıyn-saýyqtardy, toptasyp qydyrýdy doǵara turýdy talap etedi», - dedi Qyzylorda oblysynyń taýarlar men kóretiletin qyzmetterdiń sapasy men qaýipsizdigin baqylaý departamentiniń basshysynyń orynbasary, oblystyń bas memlekettik sanıtarııalyq dárigeri Álııa Ábdiqaıymova.
Oblystyń bas sanıtarynyń aıtýynsha, sanıtarlyq-gıgıenalyq talaptardy buljytaı oryndaǵanda ǵana bul ınfektsııany turaqtandyrýǵa bolady. Oblysta tirkelgen aýrýdyń 80-90% jeńil, klınıkalyq belgilerinsiz ótýde. Biraq bul jaqsy kórsetkish dep aıta almaımyz. Sebebi, klınıkasyz júrgen adamdar vırýs tasymaldaýshylary bolyp sanalady. Otbasyndaǵy, ujymdaǵy jalpy qoǵamdaǵy ımmýnıteti tómen adamdar úshin úlken qaýip tóndiredi.
«Oǵan dálel búgingi kúngi jansaqtaý bóliminde aýyr halde em alyp jatqan azamattar. Tasymaldaýshy patsıent «D» esepte turǵan, egde jastaǵy adamdar, bosanǵan nemese júkti áıelder men balalar úshin aýrý kózi bolyp tabylady.
Jalpy koronavırýs ınfektsııasynyń birneshe túri bar. Sonyń ishinde etıologııasy belgisiz bolyp otyrǵan jańa COVID-19 qozdyrǵyshy osy atalǵan toptyń basqa túrlerine qaraǵanda qorshaǵan ortada ystyqqa da, qatty sýyqqa da tózimdi. Sol sebepti ınfektsııanyń merzimdik kóterilý nemese túsýine esh áserin tıgizbeı otyr. Sondyqtan oqshaýlaý tártibi, sanıtarııalyq-gıgıenalyq erejeler saqtalmaǵan jaǵdaıda bul ınfektsııany aýyzdyqtaý múmkin emes», - dedi ol.
Qazirge deıin Qyzylorda oblysynda koronavırýs ınfektsııasyn juqtyrǵan 449 adam tirkelgen. Onyń ishinde 270 adam syrqatynan jazylyp shyqty.
Búgin QR Premer-Mınıstriniń orynbasary Eraly Toǵjanovtyń tóraǵalyǵymen ótken Koronavırýs ınfektsııasynyń taralýyna jol bermeý jónindegi vedomstvoaralyq komıssııanyń kezekti otyrysynda BQO, Qyzylorda, Mańǵystaý oblystarynda shekteý sharalary kúsheıtilýi múmkin ekeni habarlandy.