Qyzylordada sońǵy 5 jylda 45 jańa mektep salynǵan
QYZYLORDA. QazAqparat - Sońǵy 5 jylda Qyzylorda oblysynda 45 mektep salynǵan. Sonyń nátıjesinde apattyq mektepter máselesi túbegeıli sheshildi, dep habarlaıdy QazAqparat tilshisi.
Atalmysh derek ustazdar kúnine oraı ótken saltanatty shara barysynda aıtyldy.
Bilim salasy mamandary aldynda oblys ákiminiń orynbasary Rýslan Rústemov tilektestigin bildirdi. Ol ustazdardy kásibı merekelerimen quttyqtap, aımaqtyń bilim berý salasyndaǵy jetistikterin atap ótti.
«Biz bilim berý salasyna aıryqsha kóńil bólemiz. Sońǵy jyldary bıýdjetten bólinetin qarajattyń da eń kóp bóliginiń áleýmettik salaǵa, sonyń ishinde bilim salasyna bólinýi - sonyń dáleli. Bıyl aımaqtyń 60% qarjysy áleýmettik salalarǵa jumsaldy. Elbasynyń tapsyrmasyna sáıkes bizdiń óńirimizde úsh aýysymdyq mektepter máselesi sheshildi, apattyq mektepter qatary joıyldy jáne 3-6 jas arasyndaǵy búldirshinder balabaqshamen 100% qamtyldy. Bilikti de bilimdi ustazdarymyzdyń arqasynda daryndy oqýshylarymyz shetelderde halyqaralyq olımpıadalar men ǵylymı joba jarystarynda júldeger atanyp júr. Bıyl mektep bitirgen túlekterdiń 97%-y joǵary jáne arnaıy oqý oryndaryna tústi», - dedi oblys ákiminiń orynbasary.
Kásibı biliktilikteri úshin birqatar oblys ustazdary QR Bilim jáne ǵylym mınıstriliginiń «Y.Altynsarın» jáne «Bilim berý isiniń Qurmetti qyzmetkeri» tósbelgisimen, mınıstrliktiń Qurmet gramotasymen, oblys ákiminiń Alǵys hattarymen marapattaldy.
Sondaı-aq, «Ustazym, ótermin bir ózińe basymdy ıip...» taqyrybyndaǵy beınerolıkter saıysynyń jeńimpazdary Aral aýdanynyń №13, Qazaly aýdanynyń №93 jáne Qyzylorda qalasynyń №222 mektepterge (noýtbýk tabystaldy.
Atap óteıik, 2018-2019 jańa oqý jylynda aımaqtaǵy 293 mektepte 20 466 muǵalim qyzmet etedi. Al mektepterde 153 541 oqýshy bilim alady.
Oblys ákimi baspasóz óyzmetiniń habarlaýynsha, jańa oqý jylynda Qazaly jáne Jańaqorǵan aýdandarynda 300 orynǵa arnalǵan jańa mektepter paıdalanýǵa berildi. Budan basqa, jyldyń sońyna deıin Aralda 300 orynǵa jáne Qyzylordada 600 orynǵa arnalǵan mektepter salynady.
5 jyldyń ishinde oblysta 45 mektep, onyń ishinde 37-si apattyq mekteptiń ornyna salyndy. Qazirgi tańda aımaqtaǵy orta mektepterge tolyqtaı keńjolaqty ınternet tartylyp, elektrondy «Kúndelik» júıesine qosylǵan.
