Qyzylordada sońǵy 5 jylda 200 áleýmettik nysan salynǵan
QYZYLORDA. QazAqparat - Qyzylorda oblysynda jyl basynan beri 41 áleýmettik nysannyń qurylysy júrgizildi. Búgingi kúnge deıin olardyń 20-y iske qosyldy, jyl sońyna deıin 10 nysan paıdalanýǵa berilse, 2019 jyly taǵy 11-i el ıgiligine aınalady, dep habarlaıdy QazAqparat tilshisi oblys ákimdigi baspasóz qyzmetine silteme jasap.
Aıta keterligi, sońǵy 5 jylda oblysta 200 áleýmettik nysan salynǵan. Bul - Syr óńiri qurylys salasyndaǵy serpindi isterdi aıshyqtaıdy.
Qyzylordada Qurylysshylar kúnine arnalǵan saltanatty jıynda aımaqtyń úzdik qurylysshylaryna qurmet gramotasy, alǵys hattar men qurmetti qurylysshy ataǵy tabystaldy. Qyzylorda oblysynyń ákimi Qyrymbek Kósherbaev sala qyzmetkerlerin kásibı merekelerimen quttyqtap, aımaqtyń osy salada qol jetkizgen tabystaryn atap ótti.
«Qurylysshylardyń eren eńbekteriniń arqasynda búgingi kúni bizdiń óńirimiz qurylys qarqyny boıynsha aldyńǵy qatarda keledi. Sońǵy bes jylda 200 áleýmettik nysandy paıdalanýǵa berdik. Jalpy aýdany 2 mln. sharshy metr turǵyn úı el ıgiligine berilip, 7 myńnan astam qyzylordalyqtar qonys toıyn toılady. Bıylǵy jyldan bastap turǵyn úı qurylysynyń «Orda» jol kartasy júzege asyrylatyn bolady. Oblys boıynsha 1747 páterdi quraıtyn 69 turǵyn úıdiń qurylysy, sonymen qatar, Syrdarııa ózeniniń sol jaq jaǵalaýyn ıgerý jumystary da qarqyndy júrgizilýde», - dedi oblys basshysy.
Qazirgi tańda Syrdarııa ózeniniń sol jaq jaǵalaýynda jeke ınvestıtsııa esebinen kópqabatty 18 turǵyn úıdiń, «Bolashaq» ýnıversıteti kampýsynyń, MJK aıasynda 320 orynǵa arnalǵan balabaqshanyń qurylysy jáne memlekettik bıýdjet esebinen Jastarǵa qyzmet kórsetý ortalyǵynyń, elektrmen, gazben, sýmen jabdyqtaý jáne káriz júıesiniń qurylys jumystary júrgizilýde.
2019-2020 jyldary sol jaǵalaýda taǵy da birneshe kópqabatty úıler, mektepter, oblystyq kópsalaly aýrýhana, neke qııý saraıy, balabaqsha, jataqhanasymen birge fızıka-matematıkalyq mektep, saýda jáne oıyn-saýyqtyrý kesheniniń qurylysy josparlanyp otyr.
Bıyl «Nurly jer» turǵyn úı qurylysynyń baǵdarlamasy aıasynda aımaqta 69 kóp páterli turǵyn úıdiń qurylysy júrgizilýde. Bul aýdany 123,3 myń sharshy metr bolatyn 1747 páterden quralady. Onyń ishinde 21 úı jeke qurylys kompanııalarynyń esebinen salynýda. Búgingi tańda oblys boıynsha 40 ınjenerlik ınfraqurylymdyq joba boıynsha jeli 495 shaqyrymǵa keńeıdi. Buǵan qosa, memlekettik bıýdjet esebinen jaǵalaýdy, jalǵa beriletin 4 jáne kredıttik 4 úıdi, sondaı-aq uzyndyǵy 5 shaqyrym avtojoldy jóndeý jumystary júrgizilýde.
