Qyzylordada sońǵy 4 kúnde zańsyz esirtki aınalymynyń 4 deregi tirkeldi
QYZYLORDA. QazAqparat-Aqpan aıynda qyzylordalyq polıtseıler esirtki zatyn zańsyz saqtaýdyń taǵy bir deregin anyqtady. Bul týraly QazAqparat HAA tilshisi oblystyq ІІD silteme jasap habarlady.
Jergilikti polıtsııa qyzmetiniń jol-patrýldik polıtsııa saptyq bólinisteri kóshe men qoǵamdyq qaýipsizdikti qamtamasyz etý jáne qylmystyń aldyn alý baǵytynda júrgizgen profılaktıkalyq jumystarynyń barysynda Qyzylorda qalasynda júris-turysy kúdikti bir azamatty toqtatyp, tekserý barysynda ústine kıgen kýrtkasynyń qaltasynan aq tústi paraqqa oralǵan, hosh ıisti, jasyl tústi keptirilgen shóp tárizdes zatty anyqtady. Atalǵan belgisiz zatqa saraptama taǵaıyndalyp, nátıjesinde 3,13 gr. keptirilgen marıhýana ekendigi belgilendi.
Atalǵan derek boıynsha Qazaqstan Respýblıkasy Qylmystyq kodeksiniń 296-baby 2-bóligi boıynsha qylmystyq is qozǵalyp, sotqa deıingi tergep-tekserý amaldary júrgizilýde.
