Qyzylordada sońǵy 10 kúnde 45 toı ótkizý deregi anyqtaldy
QYZYLORDA. QazAqparat - Qyzylorda oblysynda sońǵy 10 kúnde 45 toı ótkizý deregi anyqtaldy, dep habarlaıdy QazAqparat tilshisi.
Oblysta osy maqsatta 24 monıtorıng toby qurylǵan. Top músheleri karantın talabyn buzý jaǵdaıynyń basym bóligi úıde ótetin kópshilik jıyn uıymdastyrýǵa qatysty ekenin aıtady.
Bıylǵy jyldyń 5 shildesinen bastap búgingi kúnge deıin ulttyq dástúrlik sıpattaǵy túrli 420 kópshilik is-shara ótken. Mundaı keleńsiz kórinister Qazaly aýdanynda kóp tirkelgen. Odan keıingi orynda Jalaǵash aýdany tur. Al úshinshi oryn Qyzylorda qalasynyń úlesinde.
«Sońǵy on kúnde oblys boıynsha 45 toı anyqtaldy. Sonyń ishinde 40 merekelik shara úıde uıymdastyrylǵan. Al 5-ýi meıramhanada ótkizilgen. Toı-jıyndar qazir tek demalys kúnderi emes, jumys kúnderi de jıi uıymdastyryla bastaǵany anyqtaldy. Sondyqtan arnaıy qurylǵan jumysshy top jumys kúnderi de jeke turǵyn úıler men meıramhanalarǵa, jalǵa beriletin kottedjderge júrgiziletin reıd sharalary kúsheıtilip otyr. Monıtorıng toby anyqtalǵan karantın talaptaryn buzý faktileri boıynsha 38 mln teńgeden astam ákimshilik aıyppul saldy», - dep málim etti Qyzylorda oblysy sanıtarlyq-epıdemıologııalyq baqylaý departamentinen.
Qyzylorda oblysynda búginge deıin 3269 adam koronavırýs ınfektsııasyna shaldyǵyp, onyń 3218-i jazylyp shyqty . Qaterli dertten 15 adam kóz jumdy.
Ótken táýlikte Qyzylorda qalasynda koronavırýs ınfektsııasymen 1 naýqas tirkeldi. Al, osy indetten 11 naýqas jazylyp shyqty.
Esterińizge sala ketelik, Qyzylorda oblysynda karantın talaptary birshama jeńildetildi.
