Qyzylordada sol jaǵalaýdaǵy qala qurylysy bastaldy
QYZYLORDA. QazAqparat - Búgin kópten kútken Syrdarııa ózeniniń sol jaǵalaýynda jańa qalanyń birinshi shaǵyn aýdanynyń qurylysy bastaldy. Oblys ákimi Qyrymbek Kósherbaev alǵashqy qurylys nysandarynyń irgetasyn qalasyp, syrboıylyqtardy osynaý tarıhı sátpen quttyqtady, - dep habarlady QazAqparat tilshisi.
«Ózderińiz bilesizder, Táýelsiz Qazaqstannyń qalyptasýynan bastap memlekettiń órkendeýi jolyndaǵy barlyq bastamalar Ult Kóshbasshysy, Elbasynyń esimimen tikeleı baılanysty. Búginde Elbasynyń sarabdal saıasatynyń arqasynda elimizdiń ekonomıkasy kemeldengen, damýdyń dańǵyl jolyn ustanǵan qýatty memleketke aınaldy. Bizdiń aımaǵymyzda jasalynyp jatqan ıgilikti isterdiń barlyǵy da Elbasynyń tikeleı qoldaýynyń jáne halyqtyń ál-aýqatyn arttyrýǵa baǵyttalǵan memlekettik baǵdarlamalardyń naqty kórinisi», - dedi aımaq basshysy.
Sol jaǵalaýda birinshi kezekte bólingen 9,8 ga aýmaqta búgin 18 kópqabatty turǵyn úıdiń jáne 320 oryndyq balabaqshanyń qurylys jumystary bastaldy. Mundaǵy nysandar qurylys kompanııalarynyń óz qarajattary esebinen jáne memlekettik-jekeshelik ádisimen salynýda. 
Sonymen qatar osy shaǵyn aýdanda jastar ortalyǵy, neke saraıy, «Bolashaq» ýnıversıtetiniń, onkologııalyq ortalyqtyń jáne jańasha salynǵan Qazaq ortalyq atqarý komıteti ǵımaratynda qala murajaıy boı kóteretin bolady. Olardyń jobasy daıyn, qarjylandyrý máseleleri negizinen sheshilgen, 600 oryndyq mektep pen taǵy bir 320 oryndyq balabaqsha qurylysy jobalanýda.
Esterińizge sala keteıik, Syrdarııa ózeniniń sol jaǵalaýyn damytý maqsatynda jalpy kólemi 1 532 gektar aýmaqqa búgingi talaptarǵa saı zamanaýı úlgidegi jańa qala salý jobasy qolǵa alynyp, byltyr El Táýelsizdiginiń 25 jyldyǵy qarsańynda alǵashqy nysan - uzyndyǵy 1,2 km avtomobıl kópiri paıdalanýǵa berildi.
