Qyzylordada sıyrǵa soǵylǵan kólikte bir adam qaza taýyp, tórt adam jaraqat aldy
Oqıǵa Shymkent-Samara tas jolynyń Qarmaqshy aýdanyna qarasty Aqtóbe eldi mekeni tusynda bolǵan. Lada Granta avtokóliginiń júrgizýshisi tasjol ústinde ıesiz júrgen sıyrǵa soǵylǵan.
«Jol-kólik apaty oqıǵasynan bir jolaýshy kóz jumdy. Odan bólek bir áıel, eki kámeletke tolmaǵan bala dene jaraqatymen aýdandyq aýrýhanaǵa jetkizildi. Al kólik júrgizýshisi alǵan dene jaraqatynan jansaqtaý bólimine jatqyzyldy. Atalǵan oqıǵa boıynsha QR Qylmystyq kodeksiniń 345-babynyń 3-bóligimen sotqa deıingi tergep-tekserý áreketteri júrgizilýde», - dep málim etti Qyzylorda oblystyq polıtsııa departamentinen.
Vedomstvo málimetinshe, saraptamalar taǵaıyndalyp, oqıǵanyń mán-jaılary anyqtalýda. Mal ıesi izdestirilýde.
Aıta keteıik, Qyzylordada kóligimen jasóspirim qyzdy qaǵyp, oqıǵa ornynan qashyp ketken júrgizýshisi ustaldy .
