Qyzylordada sırek kezdesetin taban synyǵyna kúrdeli ota jasaldy
Búldirshinniń anasy Aısholpan Ómirhanovanyń aıtýynsha, úsh jasar Gúlbaǵym kórshisiniń mototsıkli turǵan jerde oınap júrgen. Sol sátte mototsıkl sábıdiń sol aıaǵyna qulaǵan. Jaraqat alǵan bala alǵashynda aýdandyq, keıin oblystyq balalar aýrýhanasyna jetkizilipti. Onda búldirshinniń aıaǵyn kompıýterlik tomografııaǵa túsirgen. Nátıjesinde topaısúıeginiń synǵany anyqtalyp, kishkentaı patsıentke dereý operatsııa jasalǵan.
«Praktıkada men mundaı taban jaraqatyn birinshi ret kórdim. Travmatologııadaǵy topaısúıektiń jyljyp synýy sırek kezdesedi jáne aýyr jaraqat tobyna jatady. Topaısúıek arqyly deneniń búkil aýyrlyq qysymy tabanǵa beriledi. Bul – eshqandaı bulshyqet joq jalǵyz taban súıegi. Avaskýlıarlyq nekroz, degeneratıvti artroz sekildi asqyný qaýpi bar. Múgedektik deńgeıi joǵary. Jas organızm bul jaraqatpen kúresip, tez túzeledi dep úmittenemiz», - deıdi Qyzylorda oblystyq balalar aýrýhanasynyń ortoped-travmatology Oljas Qurbanbaev.
Qosa ketsek, buǵan deıin Soltústik Qazaqstan oblysynda Shveıtsarııa men Germanııadan kelgen professorlardyń qatysýymen júrek aqaýy bar úsh naýqasqa tiliksiz ota jasalǵan edi.