Qyzylordada sırek kezdesetin dala úkisi tabyldy
Mamandardyń aıtýynsha, qustyń bul túri Syr óńirinde meken etpeıdi eken, dep habarlaıdy QazAqparat tilshisi.
Oblystyq psıhıatrııalyq densaýlyq ortalyǵynda qyzmet atqaratyn Baqytkúl Qarǵabaeva jumys ornynyń aýlasynan dala úkisin kóredi. Ony dereý qusty jyly jerge ákelip, dereý tıisti oryndarǵa habarlaǵan. Mamandar dala úkisiniń «Qyzyl kitapqa» engenin aıtady.
Mamandar atalǵan mekenjaıǵa baryp, qustyń qaýipsizdigin kórdi. Qyzylorda oblystyq orman sharýashylyǵy jáne janýarlar dúnıesi aýmaqtyq ınspektsııasynyń jáne veterınarııalyq mekeme mamandary kelip, qustyń jaǵdaıyn tekserdi. Tekserý barysynda dene jaraqaty men aýrý belgileri anyqtalǵan joq. Qus ýaqytsha Qyzylorda orman sharýashylyǵy jáne janýarlardy qorǵaý memlekettik mekemesiniń mamandaryna tapsyryldy.
«Úki – japalaqtardyń ishindegi eń irisi. Negizinen ormandy mekendep, jemin kóbine túnde aýlaıtyn jyrtqysh qus. Ushqanda dybyssyz qanat qaǵady. Ol bizde týndradan basqa jerdiń barlyǵynda kezdesedi. Uıalaryn jerge, jartastarǵa, keıde aǵashtarǵa salady. Jer jaǵdaıyna jáne jyl maýsymyna qaraı qorekteriniń túrleri ózgerip turady. Jaz kezinde qoıandarmen, qosaıaqtarmen jáne kirpilermen qorektense, qys mezgilderinde maıda qustarmen azyqtanady. Qazirgi tańda Qyzyl kitapqa engen, sırek kezdesetin qustardyń sanatynda», - deıdi Qyzylorda orman sharýashylyǵy jáne janýarlardy qorǵaý memlekettik mekemesiniń mamandary.