Qyzylordada shyny zaýytynyń qurylysy bıyl aıaqtalady
QYZYLORDA. QazAqparat - Qyzylorda qalasyndaǵy shyny zaýyty qurylysynyń aıaqtalýy aǵymdaǵy jyldyń aıaǵyna josparlanyp otyr. Oblys ákimdigi qurylysty ýaqytynda aıaqtaý úshin tıisti is-sharalardy júzege asyrýda, dep habarlaıdy QazAqparat tilshisi óńir basshysynyń baspasóz qyzmetine silteme jasap.
Qyzylorda oblysynyń ákimi Qyrymbek Kósherbaev shyny zaýytynyń qurylys alańyna baryp, onda iske qosylatyn barlyq 4 nysannyń qurylys jumystarymen tanysty. Qazirgi ýaqytta munda 17 merdigerlik kompanııanyń 240-qa jýyq jumysshysy eńbek etip júr.
Búginde daıyn ónim qoımasy, ishki temir jol, negizgi tsehtar, ishki ınjenerlik jeliler keshenderi boıynsha qajetti jumystar atqarylýda. Shyny zaýytyna qajetti barlyq ınfraqurylym bıýdjettik qarajat esebinen jetkiziledi. Búgingi tańda gaz qubyrynyń eki tarmaǵy, sýmen jabdyqtaý, káriz júıesi, elektr jelileri, joldar men baılanys jelileri tartyldy. Aǵymdaǵy jyldyń qarasha aıyna deıin temir joldyń qurylysyn aıaqtaý josparlanyp otyr.
Aıta ketý kerek, «Chaına Trıýmf» kompanııasy kún batareıalary, smartfondar men planshetter (qýattylyǵy kúnine 250 tonna ýltra juqa shyny óndiretin zaýyt) úshin paıdalanylatyn óte juqa ári ýltra móldir shyny óndirý úshin joǵary tehnologııalyq zaýyt qurylysyna ınvestor retinde qosyldy.
Jańa jobanyń quny shamamen 150 mıllıon AQSh dollaryn quraıdy. Ónimderdiń negizgi artyqshylyqtary - qalyńdyǵy 0,15 mm tegis jáne optıkalyq burmalanýy tómen shyny. Zaýyt qurylysynyń ekinshi kezeńinde 500 jańa jumys ornyn, al paıdalanýǵa bergennen keıin shamamen 150-den astam turaqty jumys ornyn qurý josparlanyp otyr.
