Qyzylordada shyny zaýyty ónimderin shyǵarýda robottar qoldanylady
Zaýyt tolyq qýattylyǵyna shyqqanda 226 jańa jumys orny ashylady. Al qosalqy óndiriste 300-ge jýyq adam qyzmet etetin bolady. Jergilikti mamandarǵa basymdyq berilip, kásibı túrde shyńdalmaq.
«El Táýelsizdiginiń 30 jyldyǵyna oraı oblys turǵyndary tabaqsha shyny zaýytynyń kúıdirý peshin iske qosý rásimine kýá boldy. Joba aıasynda óńirge 42 mlrd teńgeden asa ınvestıtsııa tartylǵan bolatyn. Jylyna 197 myń tonnadan asa ónim shyǵaratyn kásiporyn – el naryǵyn qamtamasyz etip, shet memleketterge eksporttalady. Shyny zaýytynyń iske qosylýymen shıkizattyq emes sektordy damytyp, ilespe óndiristerdi qurýdy kózdep otyrmyz. Búginde ınvestorlarmen birlesip eki jobany bastadyq. Bul – kompozıttik materıaldar men aına óndirisi. Atap ótý qajet, tek 2020 jyldyń qorytyndysymen elge quny shamamen 65 mln AQSh dollaryn quraıtyn turmysqa qajetti shynylardy Qytaı, Germanııa, Ózbekstan jáne Túrkııadan ımporttalǵan. Biz zaýyt óndirisiniń iske qosylýymen kapıtaldyń basqa elderge jiberilýin toqtatamyz jáne eldi ózimiz áınekpen qamtamasyz etetin bolamyz», - dedi oblystyq ındýstrııalyq-ınnovatsııalyq damý basqarmasynyń basshysy Rınat Sultangereev.
«Orda Glass Ltd» seriktestigi men qytaılyq «China Triumph» kompanııalary birlesip júzege asyrylǵan shyny zaýyty - ındýstrııalandyrý baǵdarlamasynyń negizgi jobasy. Shyny óndirý barysynda 90 paıyz jergilikti shıkizat ónimi qoldanylmaq.
«Zaýytta álemniń jetekshi elderi - AQSh, Italııa, Belgııa, Fınlıandııa, Qytaıda shyǵarylǵan zamaýı úlgidegi tehnologııalar qoldanylady. Negizi zaýyttan shyǵarylǵan ónimniń 70 paıyzy ishki naryqta paıdalanady. Al 30 paıyzy shet elge jóneltiledi. Qazirdiń ózinde Ózbekstan, Reseı, Túrikmenstan, Tájikstan, Aýǵanstan, Úndistannan tapsyrystar túsýde. Taǵy bir ereksheligi, úlken kólemdi jáne aýyr salmaqty shyny tabaqshalaryn kesýge jáne tasymaldaýǵa robottar qoldanylmaq. Jalpy 3 aı ishinde balqytý peshi 1600 gradýs temperatýraǵa deıin qyzyp, turaqty ári úzdiksiz gazben jabdyqtaýdy talap etedi. Qazirgi kezde ımporttalyp kelgen 1 tonna shyny 300-350 dollardy qurasa, bizdiń zaýyttan shyǵatyn ónimniń baǵasy 200-250 dollardyń kóleminde bolady», - dedi «Orda Glass Ltd» JShS basqarma tóraǵasy Erjan Saǵynbaev.
