Qyzylordada shildede 1,2 myń adam koronavırýs juqtyrdy
Óńirde 19 shildege deıin koronavırýs ınfektsııasynyń 8 356 jaǵdaıy tirkeldi. Saldarynan 100 myń halyqqa shaqqandaǵy aýrýshańdyq kórsetkish 1016,1 qurady. Onyń ishinde 55 paıyzy klınıkalyq belgisimen anyqtalsa, 45 paıyzy sıpmtomsyz.
Barlyq tirkelgen jaǵdaıdyń 61,6 % Qyzylorda qalasynyń úlesinde, ol 5 150 turǵyn. Aýdandar boıynsha Aralda - 381, Qazalyda - 393; Qarmaqshyda - 390, Jalaǵashta - 240, Syrdarııada - 474, Shıelide - 594, Jańaqorǵanda - 734 adam ınfektsııa juqtyrǵan.
«Tirkelgen koronavırýs ınfektsııasynyń 2 paıyzy syrttan kelse, 58 paıyzy skrınıng tekserý barysynda belgili bolǵan. Al 40 paıyzy qarym-qatynas arqyly juqtyrǵan. Aýrýǵa shaldyqqan 7 082 naýqastyń 86,3 paıyzy emdelip shyqty.
Infektsııa juqtyrǵandardyń jas shamasy ártúrli. Olardyń arasynda jańa týǵan náreste men egde jastaǵy azamattar da bar. Sonyń ishinde 20-69 jas aralyǵyndaǵy azamattardyń úles salmaǵy basym», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Onyń aıtýynsha, shilde aıynyń sońǵy aptasynda kúndelikti 60 jaǵdaıdan bastap 140 jaǵdaıǵa deıin tirkelýde. Al 18 shildede oblys boıynsha bıyl eń kóp naýqas tirkelgen, ol 140 jaǵdaıǵa jetti.
Qazir oblys turǵyndary arasynda balalardyń qaterli indetke shaldyǵýy jıilep keledi. Máselen, bıylǵy jyldyń 6 aıynda 18 jasqa deıingi balalar arasynda 765 jaǵdaı bolsa, onyń 211-i shilde aıynyń 18 kúninde tirkelgen.
Eske salsaq, Qyzylordada 201 myńnan astam adam koronavırýsqa qarsy vaktsına saldyrdy.
