Qyzylordada sheteldik jumysshylar úshin para alǵan sheneýnik ustaldy
ASTANA. QazAqparat - Qyzylorda oblysynda sheteldik jumysshylardyń Qazaqstanda júrý merzimin uzartqany úshin para alyp kelgen sheneýnik ustaldy, dep habarlaıdy QazAqparat tilshisi Sybaılas jemqorlyqqa qarsy kúres jónindegi Ulttyq bıýroǵa silteme jasap.
«Sybaılas jemqorlyqqa qarsy kúres jónindegi Ulttyq bıýronyń Qyzylorda oblystyq departamenti «Jumyspen qamtý jáne áleýmettik jobalardy úılestirý basqarmasy» memlekettik mekemesiniń basshysy Amanjol Aldajarovtyń qylmystyq áreketin áshkereledi. Ol jer qoınaýyn ıgerip jatqan kompanııalardan sheteldik jumysshalardyń Qazaqstanda júrý merzimin uzartqany úshin turaqty túrde para alyp kelgen. Atalǵan sheneýnik zańsyz alǵan aqshanyń jalpy kólemi 350 myń teńgeni qurady. Kúdikti óz kinásin tolyǵymen moıyndady. Qazirgi kezde sotqa deıingi tergeý amaldary júrgizilýde», - delingen resmı habarlamada.
