Qyzylordada shetel azamattarynan udaıy para alyp kelgen polıtsııa maıory jazalandy
QYZYLORDA. QazAqparat - Shetel azamattarynan para alǵan qyzylordalyq maıor jazaǵa tartyldy, dep habarlaıdy QazAqparat.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń baspasóz qyzmetiniń málimetteri boıynsha jyl basynda Qyzylorda oblysy Shıeli aýdandyq ishki ister basqarmasy kóshi - qon polıtsııasy qyzmetiniń bastyǵy quqyq qorǵaýshylardyń quryǵyna ilikken bolatyn.
Polıtsııa maıory ózbek azamattarynan júıeli túrde para alǵany úshin aıyptaldy. Sondaı-aq onyń kórshiles aǵaıyndarǵa jergilikti jerge kedergisiz tirkeý jasaýǵa kómektesip otyrǵany anyqtaldy. Atalmysh fakti boıynsha qylmystyq is qozǵalyp, tergeý amaldary júrgizildi. Onyń barysynda polıtsııa qyzmetkeriniń sheteldikterden birneshe márte 5000 teńge men 20 000 teńge aralyǵynda para alyp otyrǵany belgili boldy.
«Burynǵy polıtsııa maıorynyń qylmystyq isi Shıeli aýdandyq sotynda qaraldy. Sot úkimimen oǵan 3 mıllıon 500 myń teńge kóleminde aıyppul salynyp, «polıtsııa maıory» sheninen aıyryldy. Sondaı -aq, endi ol quqyq qorǵaý organdarynda jumys jasaı almaıdy. Jalpy, ishki ister organdary qyzmetkerleriniń arasynda jemqorlyqqa jol bermeý úshin tıisti sharalar jasalyp jatyr. Biraq, profılaktıkalyq jumystarǵa qaramastan osyndaı zańdy óreskel buzǵandar jıi kezdesedi», - dep málimdedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń baspasóz qyzmeti.
