Qyzylordada shegirtkege qarsy 144 myń gektar alqap óńdeledi
QYZYLORDA. QazAqparat - Ústimizdegi jyly Qyzylorda oblysy boıynsha 144 392 gektar alqap zııankesterge qarsy óńdeletin bolady, dep habarlaıdy QazAqparat tilshisi.
Óńirde shegirtkeniń ıtalııalyq prýs jáne azııalyq túrleri kezdesedi.
«Erekshe qaýipti azııalyq shegirtke zııankesterine qarsy jazǵy-kúzgi monıtorıng qorytyndysymen ústimizdegi jylǵa 78 849 gektar jerge hımııalyq óńdeý júrgiziledi. Óńdeý jumystaryn 27 mamyrdan 25 maýsymǵa deıingi aralyqta júrgizý josparlanyp otyr. Shegirtkeniń bul túri oblystyń barlyq aýmaǵynda kezdesedi. Ásirese, Aral men Shıelide kóbirek kórinis berip otyr. Atap aıtqanda, Aralda - 17,8, Shıelide 16,9 gektar alqap azııalyq shegirtke túrine qarsy óńdelse, ol Qazalyda - 10,8, Jalaǵashta 9,5, Jańaqorǵanda - 7,1, Syrdarııada - 6,6, Qarmaqshyda - 6, Qyzylordada - 4 myń gektardy quraıdy», - deıdi QR AShM Agroónerkásiptik keshendegi memlekettik ınspektsııa komıtetiniń Qyzylorda oblystyq aýmaqtyq ınspektsııasynyń basshysy Erkebulan Bekjanov.
Italııalyq prýs túri Aral aýdanynda shoǵyrlanǵan, onda 44,1 myń gektar alqap atalmysh zııankeske qarsy óńdeledi. Al Qazalyda - 10,5, Jalaǵashta - 9,2, Syrdarııada - 1, Qarmaqshyda - 0,7 gektar alqap óńdeýge jatqyzylady. Jalpy alǵanda, bul boıynsha 65 543 gektar jerge hımııalyq óńdeý júriziledi.
Ádilet QAŃTARBAEV
