Qyzylordada Shahmardan Esenovtiń mereıtoıy atalyp ótti
QYZYLORDA. QazAqparat - Qyzylordada memleket jáne qoǵam qaıratkeri, geologııa-mıneralogııa ǵylymdarynyń doktory, ǵalym Shahmardan Esenovtyń 90 jyldyq mereıtoıyna arnalǵan shara ótti, dep habarlaıdy QazAqparat tilshisi oblystyq ákimdikke silteme jasap.
Oblys ortalyǵynda «Qazaqstannyń ken resýrstary: ıgerilýi, damý barysy men bolashaǵy» atty respýblıkalyq ǵylymı-tájirıbelik konferentsııasymen jalǵasty.
Konferentsııaǵa qatysqan oblys ákimi Qyrymbek Kósherbaev Shahmardan Esenovtyń qazaqstandyq geologııa-mıneralogııa ǵylymyna qosqan eńbegin atap ótti.
«Shahmardan Esenov Ǵylym akademııasyn basqaryp turǵan kezeńderde Syr óńiriniń jer asty qazba baılyqtaryn barlaýdy qolǵa alý qajettigin batyl dáleldedi. Búginde qorǵasyn myryshty óndirýmen aınalysatyn «Shalqııa kenishiniń», «Qumkól» munaı kenishiniń, Araldaǵy óte joǵary sapaly kvarts qumy ken ornynyń ashylýyna zor eńbek sińirdi. Buǵan qosa aımaqta altyn men kúmis te bar ekendigin alǵash ǵylymı dáıektegen de Shahmardan Esenov boldy. Mine, qazaqtyń mańdaıyna bitken asyl da, atpal azamattyń bastamasy búginde Syr óńirinde keńinen qanat jaıýda. Aımaǵymyz «Horasan-2» kenishinde jerasty qazba baılyǵyn óndirýde aıtarlyqtaı tabysqa jetip keledi. Ýran ónerkásibimen aınalysatyn kásiporyndardyń biri - «Baıken-U» JShS-i kásipornynda búginde 497 adam jumys jasaýda. «Shalqııa» kenishinde 500-ge jýyq adam eńbek etip jatyr. Óndiris orny toqyrap qalǵan tusta ózge óńirlerge kóship ketken mamandar elge qaıta oralýda. Taıaý arada kásiporyn tolyqtaı iske qosylǵan kezde munda 1540 adam turaqty jumyspen qamtylatyn bolady», - dedi aımaq basshysy.
Sonymen qatar, konferentsııaǵa QR Parlamenti Senatynyń depýtaty Murat Baqtııaruly, Kaspıı memlekettik tehnologııa jáne ınjınırıng ınstıtýtynyń prorektory Gúlsara Joldasbaeva jáne elimizdiń jetekshi joǵary oqý oryndarynyń ǵalymdary, doktoranttar men magıstranttar qatysty.
Á.Tájibaev atyndaǵy oblystyq ǵylymı ortalyq kitaphanasynda Shahmardan Esenovtyń ómir joly men eńbekterine arnalǵan "Ónegeli ómir" jáne "Shahmardan" kitaptarynyń tusaýkeseri ótti.
Erteń 21 qyrkúıek kúni Shıeli aýdanynda Sh. Esenovtyń bıýsti men murajaıynyń ashylýy jáne ózi týyp ósken Tartoǵaı aýylynda mádenıet Úıiniń irgetasy qalanady. Sondaı-aq, qazaqsha kúresten respýblıkalyq týrnır, respýblıkalyq aıtys, gala-kontsert jáne ózge de merekelik sharalar uıymdastyrylady.
