Qyzylordada Seýl ýnıversıtetiniń jasandy ıntellekt mektebi ashylýy múmkin
«Búgingi kezdesýde mádenı-gýmanıtarlyq yntymaqtastyqty ilgerilete túsýde ózara qoldaý kórsetemiz dep ýaǵdalastyq. Áńgime barysynda koreı eliniń batyry, general Hoń Bom Donyń murasyna qatysty jobalarǵa kóńil bólindi. Qorqyt ata atyndaǵy Qyzylorda ýnıversıtetinde Seýl ulttyq ǵylym jáne tehnologııa ýnıversıtetiniń jasandy ıntellekt mektebin ashý jóninde jan-jaqty pikir almasý boldy», - dedi Premer-Mınıstrdiń orynbasary – Syrtqy ister mınıstri Murat Nurtileý Ońtústik Koreıa Respýblıkasynyń syrtqy ister mınıstri Pak Jınniń elimizge sapary barysynda uıymdastyrylǵan brıfıngte.
Sondaı-aq, mınıstr eki eldiń syrtqy vedomstvolary arasynda 2023-2024 jyldarǵa arnalǵan yntymaqtastyq jónindegi ózara túsinistik memorandýmyna qol qoıylǵanyn habarlady.
«Búginde elimizde 119 myń koreı azamaty turyp jatyr, olar - bizdiń qoǵamnyń ajyramas bóligi. Táýelsizdigimiz ben el damýyna bir kisideı atsalysyp júrgen belsendi azamattar. Osynyń bári Qazaqstan men Ońtústik Koreıa arasyndaǵy dostyq pen strategııalyq áriptestiktiń irgetasyn nyǵaıtýǵa septigin tıgizip otyr. Búgingi kelissóz barysynda mınıstr Pak Jın myrzamen yqpaldastyǵymyzdy ári qaraı damytý joldary jóninde nátıjeli pikir almastyq», - deıdi vedomstvo basshysy.
