Qyzylordada Seýl ulttyq ǵylym jáne tehnologııalar ýnıversıtetiniń jasandy ıntellekt mektebi ashylady
Delegatsııa quramynda Qyzylorda oblysynyń ákimi Nurlybek Nálibaev, Qazaqstan Respýblıkasynyń Koreıadaǵy Tótenshe jáne Ókiletti Elshisi Baqyt Dúısenbaev, oblystyq máslıhat tóraǵasy Naýryzbaı Baıqadamov, Qorqyt ata atyndaǵy Qyzylorda ýnıversıtetiniń rektory Beıbitkúl Kárimova bar.
Іssapardyń alǵashqy kúni delegatsııa músheleri bilim jáne ǵylym salalarynda yntymaqtastyq ornatý úshin Shınhan ýnıversıtetiniń prezıdenti Kang Song Chong myrzamen kezdesti. Áleýmettik ǵylymdar baǵyty boıynsha mańdaıaldy JOO-lardyń biri – Shınhan ýnıversıteti 1960 jyly qurylǵan.
Kezdesýde Kang Song Chong myrza Qyzylordada ýnıversıtet fılıalyn ashýǵa yntaly ekenin bildirdi. Osy rette aldaǵy 20-30 jyldyqta óńirdiń eńbek naryǵynda qandaı mamandyqtardyń suranysqa ıe bolatynyn ekijaqty zertteı kelip, joǵary oqý ornyn ashý josparlanýda. Osy máselelerdi ári qaraı pysyqtaý úshin aldaǵy shilde aıynda Shınhan ýnıversıteti prezıdentiniń Qyzylordaǵa issaparyn uıymdastyrý kózdelgen. Eńbek naryǵynyń bolashaqtaǵy baǵyty zerttelgennen keıin Shınhan ýnıversıtetiniń fılıaly qandaı mamandyqtar boıynsha ashylatyny naqtylanady.
Koreıa Respýblıkasyndaǵy issapar barysynda Seýl Ulttyq ǵylymı-tehnıkalyq ýnıversıtetiniń Prezıdenti Lı Dong Hýn myrzamen kezdesý ótti. Jıynǵa QR Ǵylym jáne joǵary bilim mınıstri Saıasat Nurbek vıtse-mınıstrlermen birge onlaın qosylyp, bastamalarǵa qoldaý kórsetiletinin aıtty.
Prezıdent Qasym-Jomart Kemeluly Toqaevtyń bilim sapasyn arttyrý úshin álemdegi ozyq joǵary oqý oryndarynyń fılıaldaryn elimizde ashýdy tapsyrǵany belgili. Bul eń aldymen bilikti mamandardy oqytyp shyǵarýǵa, joǵary tehnologııalardy ıgerýge jol ashady.
Koreıa men Qazaqstan arasynda joǵary bilim salasyndaǵy ekijaqty yntymaqtastyqty damytý úshin bıyl Halyqaralyq yntymaqtastyq jónindegi jetekshi ýnıversıtettik joba ázirlendi. Joba Koreıa Respýblıkasynyń Úkimetinde maquldanyp, Bilim mınıstrliginen granttyq joba retinde 1 mlrd teńgedeı qarjy bólinedi.
Sondaı-aq, ýnıversıtet prorektorlary, ınstıtýt dırektorlary men kafedra meńgerýshileri jáne de túrli salalar boıynsha qurylym basshylary 16 myń stýdenti, 9 fakýlteti, 300 oqytýshy-professory bar Seýl Kıber ýnıversıtetimen tanysty.
Ýnıversıtet basshylyǵy aldaǵy ýaqytta Seýl Kıber ýnıversıtetimen áriptestik baılanysty nyǵaıtyp, birlesken jobalardy atqarý jónindegi kelisimge keldi.
