Qyzylordada Semeı polıgony jabylýynyń 30 jyldyǵyna oraı konferentsııa ótti
«Semeı polıgonynyń jabylýy - táýelsizdiktiń teńdessiz jeńisi» taqyrybymen uıymdastyrylǵan konferentsııada synaq alańynyń jabylýyna qatysty tarıhı derekter keńinen talqylandy. Polıgonda áskerı boryshyn ótegen ardagerler kózben kórgen oqıǵasymen bólisti.
Jıynda QR Parlamenti Senatynyń depýtaty Aqmaral Álnazarova, oblys ákiminiń orynbasary Serik Ahmet, oblystyq «Qyzylorda-Nevada-Semeı» qoǵamdyq birlestiginiń tóraǵasy Sábıt Ábish pen birlestik músheleri, oblystyq ardagerler keńesiniń tóraǵasy Serik Ábish jáne máslıhat depýtattary boldy. Sondaı-aq, joǵary oqý oryndarynyń ǵalymdary, úkimettik emes uıym ókilderi, oblystyq etnomádenı birlestikter men jastar uıymynyń jetekshileri men belsendileri jáne qala jáne aýdandardaǵy zııaly qaýym ókilderi beınebaılanys arqyly qatysty.
QR Parlamenti Senatynyń depýtaty Aqmaral Sháripbaıqyzy Semeı ıadrolyq polıgonynyń jabylýy búkil álemdegi ıadrolyq synaqtarǵa moratorıı qoıý jónindegi halyqaralyq is-qımylǵa jáne Ortalyq Azııadaǵy ıadrolyq qarýdan azat aımaqty qurýǵa negiz bolǵandyǵyn basa aıtty. Sonymen qatar, jalpy qazaqstandyqtarǵa ǵana emes, búkil adamzat úshin mańyzdy oqıǵaǵa aınalǵan Semeı polıgonyn jabý elimiz Táýelsizdik alar tusta qabyldanǵan eń mańyzdy sheshim boldy dep atap ótti.
Basqosýda oblys ákiminiń orynbasary «Qazaqstan - álemde birinshi bolyp, ıadrolyq qarýdan bas tartqan el. 2009 jyly Elbasymyz 29 tamyzdy ıAdrolyq qarýdan bas tartýdyń búkilálemdik kúni dep jarııalaý jóninde bastama kóterip, Birikken Ulttar Uıymy tarapynan qoldaý tapty. Nátıjesinde 40 jyl boıy ajal otyn shashqan qasıetti Semeı óńirindegi polıgonnyń jabylýy - Qazaq eli úshin úlken baqyt, álem halqy úshin úlken jetistik ákeldi. Semeı polıgonyn jabý jáne Qazaqstannyń ıadrolyq qarýdan óz erkimen bas tartý jónindegi tarıhı sheshimi qabyldanǵan bul kúndi ulyqtaý bizge paryz», - dedi.
Konferentsııa barysynda baıandama jasaǵan Qorqyt Ata atyndaǵy Qyzylorda ýnıversıtetiniń tarıh ǵylymdarynyń doktory Tastanbek Sátpaı taqyrypqa baılanysty tyń málimettermen bólisti.
Konferentsııa sońynda Serik Ábjáliuly oblystyq «Qyzylorda-Nevada-Semeı» qoǵamdyq birlestiginiń tóraǵasy Sábıt Ábishke oblys ákimi Gúlshara Ábdiqalyqovanyń «Alǵys hatyn» tabystady.
