Qyzylordada sekseýil urlap bara jatqan ekeý ormanshylardy uryp-soǵyp, qashyp ketken
QYZYLORDA. QazAqparat - Qyzylordada orman sharýashylyǵy ınspektorlaryna kúsh qoldanǵan qala turǵyndary ustaldy, dep habarlaıdy QazAqparat tilshisi.
Qyzylorda qalasy polıtsııa basqarmasynyń jedel basqarý ortalyǵyna habarlama kelip tústi.
Onda oblys ortalyǵyna qarasty Tasbóget kentinde «GAZel» avtokóliginiń zańsyz sekseýil tıep bara jatqany aıtylǵan.
Bul jóninde Qyzylorda oblystyq janýarlar dúnıesin qorǵaý jáne orman sharýashylyǵy mekemesiniń qyzmetkerleri habarlaǵan.
Oblystyq polıtsııa departamentiniń málimetinshe, orman sharýashylyǵy ınspektorlary «GAZel» avtokóligin toqtatqan. Alaıda, avtokólik júrgizýshisi olardyń zańdy talabyna baǵynbaǵan.
Oqıǵa ornynan qashyp, bir úıdiń aldyna baryp toqtaǵan. Odan keıin janyndaǵy serigi ekeýi ormanshylarǵa kúsh qoldanyp, dene jaraqatyn salǵan.
«Tekserý barysynda olardyń ekeýi de qala turǵyndary ekeni anyqtaldy. Kúdiktiler Qyzylorda qalalyq polıtsııa basqarmasynyń ýaqytsha ustaý ızolıatoryna qamaldy. Aıǵaq zat retinde 50 qap sekseýil alyndy. Atalǵan derek boıynsha QR Qylmystyq kodeksiniń 380-babynyń 2-bóligimen sotqa deıingi tergep-tekserý amaldary júrgizilýde. Onda bılik ókiline qatysty kúsh qoldaný jaǵdaıy kórsetilgen», - dep málim etti departamentten.
