Qyzylordada saıt ashyp, turǵyndardy soǵan aldap aqsha saldyrǵan áıel 3 jylǵa sottaldy
QYZYLORDA. QazAqparat - Qyzylorda qalasynda turǵyndardy aldaý jolymen qyrýar qarjyny ıemdenip ketken áıeldiń bas bostandyǵy shekteldi, dep habarlaıdy QazAqparat tilshisi.
Ońaı jerden «olja» izdegen azamatsha óziniń oıyn júzege asyrý úshin «Whats App» messendjerin paıdalanǵan. Sonda jalǵan joba jasap arnaıy saıt ashqan. Alaıaq áıel turǵyndardy sol jobanyń esep-shotyna aqsha salsa, odan keıin qarjysyn 60 paıyz ústemaqy arqyly qaıtaryp alatynyn jetkizgen. Degenmen ol jurttyń qarjysyn ıemdenip ketý maqsatynda oıyn júzege asyrǵan.
«Osylaısha ol azamattardyń salǵan aqshalaı qarajatyn alaıaqtyq jolmen ıemdenip ketken. Bul is boıynsha QR Qylmystyq Kodeksiniń 190-baby 3-bóliginiń 4-tarmaǵymen (alaıaqtyq) kináli dep tanyldy. Qyzylorda qalalyq sotynyń úkimimen onyń 3 jylǵa bas bostandyǵy shekteldi», - dáp málim etti Qyzylorda oblystyq polıtsııa departamenti.
Sońǵy ýaqytta Syr óńirinde ǵalamtor jelisi nemese uıaly telefon arqyly senimge kirip, esep-shotyna aqsha saldyrǵan alaıaqtar sany kóbeıip otyr. Bıyl ǵalamtor jelisi arqyly jasalǵan alaıaqtyqtyń 189 deregi anyqtaldy. Bıylǵy jyldyń 10 aıynda alaıaqtyq jasaǵany úshin ustalǵan 242 tulǵanyń 160-y áıelder.
«Alaıaqtyq qylmysyn ashýda qıyndyq týdyratyn másele - jábirlenýshilerdiń kesh aryzdanýy. Esepti merzimde alaıaqtyq qylmysy boıynsha 26 azamat quzyrly organdarǵa kesh aryzdanǵan. Bul tusta tek alaıaqtar týraly ǵana emes, keı azamattardyń jeńil paıda tabýǵa, máseleni sheshýdiń ońaı jolyn izdeýge beıimdigin, quqyqtyq saýaty tómendigin eskere ketýimiz kerek. Mine, osy jaıttardyń barlyǵy alaıaqtyń arbaýyna túsýine múmkindik týdyrady», - dedi vedomstvo mamandary.
