Qyzylordada saılaý protsesi máseleleri talqylandy
QYZYLORDA. QazAqparat - Elimizdiń ortalyq saılaý komıssııasynyń tóraǵasy Nurlan Ábdirov Qyzylorda oblysy jurtshylyǵymen júzdesip, saılaý protsesi máseleleri boıynsha oı bólisti, dep habarlaıdy QazAqparat tilshisi.
Elimizdiń ortalyq saılaý komıssııasynyń tóraǵasy Nurlan Ábdirov Qyzylorda oblysyna jumys saparmen keldi. Sapar aıasynda saılaý komıssııalarynyń músheleri, saıası partııalar, úkimettik emes uıymdar, buqaralyq aqparat quraldary ókilderi, qoǵamdyq pikir kóshbasshylarymen saılaý protsesi máselesi boıynsha oı bólisti.
Memleket basshysynyń tapsyrmasy boıynsha Ortsaılaýkomnyń jumys sapary elimizdiń barlyq óńirinde jasalady.
«Alǵashqy kezdesýimizdi Syr boıynan bastaǵandy jón sanadyq. Bul kezdeısoq emes. Qyzylorda - Qazaqstannyń tuńǵysh elordasy retinde zor qurmetke ıe. Árbirimiz úshin kıeli topyraq», - dedi N. Ábdirov.
Kezdesý barysynda kópshilik tarapynan atalǵan taqyrypqa baılanysty usynys-pikirler aıtyldy. Qoǵam belsendisi Lázzat Baqtybaeva, Erik Teńizbaev, eńbek ardageri Asylbek Jumabaev, jýrnalıster Erqanat Sársenbaı men Sáken Aldashbaev jáne ózge de azamattar saılaýdy uıymdastyrý máselesine baılanysty oılaryn aıtyp, kókeıde júrgen saýaldaryn qoıdy. Júzdesýde saılaý júıesin jáne onyń zańnamasyn jetildirý, saılaýdy uıymdastyrý jáne ótkizý kezinde ony quqyqtyq turǵydan qoldaný jónindegi keshendi máseleleri men usynysy talqylandy.
N.Ábdirov Ortsaılaýkom men saılaý organdarynyń negizgi mindeti zańnamaǵa sáıkes barlyq saılaý protsesiniń ashyqtyǵyn qamtamasyz etý ekenin erekshe aıtyp ótti
Elimizdiń ortalyq saılaý komıssııasynyń tóraǵasy Qyzylorda oblysyna jumys sapary aıasynda Syrdarııa aýdanynyń ortalyǵy - Tereńózek kenti ákimin saılaýǵa baılanysty daıyndyq sharasymen tanysty. Odan keıin atalǵan aýdannyń Naǵı Іlııasov aýylyna keldi. Onda byltyr aýyl ákimin saılaý sharasy ótkizilgen bolatyn.
Eske salsaq, budan buryn Qyzylordada aqparattyq kontentti jan-jaqty ilgeriletý máselesi tarazylandy.
