Qyzylordada sáýir aıynda 8 kúnde 244 adam koronavırýs juqtyrdy
QYZYLORDA. QazAqparat - Qyzylorda oblysynda sáýir aıynyń segiz kúninde 244 adam koronavırýs juqtyrdy, dep habarlaıdy QazAqparat tilshisi.
Ótken táýlikte óńirde koronavırýs ınfektsııasyn juqtyrýdyń 43 jaǵdaıy tirkeldi. Onyń ishinde 25-i Qyzylorda qalasynda tirkelse, aýdandar boıynsha ol Aral men Qarmaqshyda - 1, Syrdarııa men Shıelide - 3, Jańaqorǵanda - 4, Qazalyda - 6 jaǵdaıdan boldy.
Búginde oblysta koronavırýs ınfektsııasyn juqtyrǵandar sany 4288 adamǵa jetti.
Olardyń basym bóligi vırýs juqtyrǵan naýqastarmen jaqyn qarym-qatynasta bolǵan adamdar arasynan anyqtaldy. Mundaı naýqastardyń sany 20 adamdy quraıdy.
Sońǵy aptadaǵy kórsetkishter boıynsha Qyzylorda oblysy 8 sáýirden bastap epıdahýaldy baǵalaý matrıtsasynda «sary» aımaqqa ótti. Qyzylorda oblysynyń Bas memlekettik sanıtarııalyq dárigeriniń 2021 jylǵy 11 naýryzdaǵy №4 qaýlysyna sáıkes karantın sharalaryn kúsheıtý epıdemılogııalyq ahýal asqynǵan jaǵdaıda 5 kún ishinde júrgiziledi. Oblys boıynsha «sary» aımaq 5 kún turaqty saqtalatyn bolsa, karantın sharalary kúsheıtiledi.
«Jyl basynan beri joǵary kórsetkish - aqpan aıynda 240 jaǵdaı tirkelgen edi. Sáýir aıynyń nebári segiz kúninde 244 adam qaterli dertke shaldyqty. Bul epıdemıologııalyq ahýaldyń kún saıyn kúrdelenip jatqandyǵyn kórsetedi. Aımaqta oıyn-saýyq is-sharalaryn, sondaı-aq otbasylyq, saltanatty, estelik is-sharalardy ótkizýge, merekelik korporatıvterdi uıymdastyrýǵa tyıym salynǵan. Soǵan qaramastan toı ótkizý, qonaqqa barý, áli de azaıar emes. Bul eresek adamdardyń ózderine qaýip tóndirýmen qatar, aýrýdyń toptasqan jaǵdaılarynyń oryn alýyna soqtyrady», - dep málim etti oblystyq sanıtarııalyq-epıdemıologııalyq baqylaý departamentinen.
Aıta keterligi, Qyzylorda oblysynda bir jasqa deıingi sábılerdiń koronavırýs juqtyrýy alańdatyp otyr.
