Qyzylordada salynǵan qorǵanys bógeti sý basý qaýpin seıiltti
QYZYLORDA. QazAqparat - Qyzylorda qalasy sol jaǵalaýyn bekitý jobasy aıasynda sońǵy eki jylda salynǵan 10 shaqyrym qorǵanys bógeti bıyl sý basý qaýpin seıiltýge oń septigin tıgizdi, dep habarlaıdy QazAqparat tilshisi.
«Bul - kópten beri sheshimin kútip júrgen másele edi. Jylma-jyl Qyzylorda qalasynyń jaǵalaýyn tasqyn sýlardan saqtaýǵa nazar aýdarylyp keledi. Sońǵy eki jylda Úkimet esebinen Qyzylorda qalasynyń sheginde Syrdarııa ózeniniń sol jaǵalaýyn bekitý jobasyna 2,9 mlrd teńge qarjy bólindi. Alǵashqy kezekte 10 shaqyrym qorǵanys bógeti salyndy. Aıta keterligi, qorǵanys bógeti buǵan deıin salynǵan oń jaǵalaýdaǵy deńgeıinde saqtalǵan. Bógettiń eni 6 metr bolsa, joǵary betkeıi 1 metr qaldyńdyqta taspen qaptaldy. Tastyń astyna geotekstıl materıaly salyndy», - dedi Qyzylorda oblysy ákiminiń orynbasary Serik Qojanııazov.
Osyndaı sharalardyń nátıjesinde darııa arqyly oblys aýmaǵyna sýdyń mol kelý kezeńinde de qorǵanys bógetteri tasqynǵa tosqaýyl bolyp otyr. Qorǵanys bógetteri budan buryn oblys ortalyǵyn sý basý qaýpinen saqtap qaldy.
Qyzylorda oblysynda Syrdarııa ózeninde sý deńgeıi birshama kóterilgen bolatyn.
