Qyzylordada sal aýrýymen aýyrǵan balalardy jylqymen serýendetý arqyly emdeýde
QYZYLORDA. QazAqparat-Qyzylorda oblysynda balalardyń densaýlyq jaǵdaıy erekshe nazarda. Sońǵy 4-5 jylda osy baǵytta birqatar áleýmettik mańyzdy jobalar júzege asty. Sonyń biri keshe Halyqaralyq balalardy qorǵaý kúnine oraı ashylǵan ıppoterapııa ortalyǵy. Inklıýzıvtik baǵyttaǵy «Shaǵban» jeke balabaqshasy janynan ashylǵan ortalyqta mamandar sal aýrýyna shaldyqqan balǵyndardy jylqymen serýendetý arqyly emdeıdi, dep habarlaıdy QazAqparat tilshisi.
Qazir munda 100-ge jýyq bala em alyp jatyr. Jobaǵa qoldaý kórsetken jergilikti kásipker Qanat Smaǵulov ortalyqty kólikpen qamtamasyz etip, ortalyqqa jylqylardy jetkizip, emdeý sharalaryn júrgizetin alań daıyndap berdi.
Joba jetekshisi Japyraq Uzaqbaevanyń aıtýynsha, bul em sal aýrýyna shaldyqqan balalar úshin asa qajet. Sonymen qatar ıppoterapııa júıke aýrýlaryna shaldyqqan balalarǵa da paıdaly, tek jattyǵýdy durys josparlaý qajet. Jylqymen jeńil jelip, baıaý serýendegende, adam denesine mınýtyna 100 shaıqaý ımpýlsi beriledi. Ol - massaj, at ústinde otyrǵan adamnyń barlyq bulshyq eti jumys isteıdi. Tepe-teńdikti saqtaý úshin salt mingen adam boıyn jınaýǵa, óziniń árbir dene qımylyn ıgerýge jattyǵady. Jylqy - naǵyz tabıǵı trenajer.
Ippoterapııadan bólek «Shaǵbanda» «AMETIST» ınnovatsııalyq baǵdarlamasy arqyly aýtızmi bar balalardy emdeýdiń jańa tásilderi qoldanylady. Bul bastama «Balapan» baǵdarlamasy aıasynda júzege asyrylýda.
Ortalyqtyń ashylýynda oblys ákimi Qyrymbek Kósherbaev «Shaǵban» mamandarynyń tájirıbesin aımaqqa taratý qajettigine nazar aýdardy.
«Oblystaǵy múmkindigi shekteýli 5062 balanyń 2238-i ınklıýzıvti bilimmen qamtyldy. Sizder ata-babamyzdyń dástúrin nasıhattap, balalardy atqa mingizý arqyly saýyqtyryp qana qoımaı, sonymen qatar úlken ómirge jol ashyp berip otyrsyzdar. Biz «Shaǵban» balabaqshasynyń tájirıbesin oblys kóleminde nasıhattap, qoldap, onyń jumys aıasyn keńeıtýge múddelimiz. Aldaǵy ýaqytta oblystyq ákimdik tarapynan bul jumysty zerttep, tájirıbeniń ári qaraı jumys isteýine múmkindikter jasaımyz,- dedi aımaq basshysy.
