Qyzylordada saqshylar kópqabatty úıde tereze aldynda otyrǵan balany qutqardy
QYZYLORDA. QazAqparat - Qyzylorda qalasynda ýchaskelik polıtsııa ınspektorlary kópqabatty úıdiń terezesi aldynda turǵan úsh jasar balany qutqaryp qaldy, dep habarlaıdy QazAqparat tilshisi.
Atalmysh oqıǵa Qyzylorda qalasyndaǵy «Shuǵyla» móltek aýdanynda boldy. Qyzylorda qalalyq polıtsııa basqarmasynyń jedel basqarý ortalyǵynyń 102 telefonyna belgisiz bir azamatsha habarlasqan. Ol kópqabaty úılerdiń birinde ekinshi qabattyń temir torsyz qorshalmaǵan tereze jaqtaýynda búldirshinniń otyrǵandyǵyn aıtqan.
«Habarlama alǵannan keıin osy aımaqtyń ýchaskelik polıtsııa ınspektorlary oqıǵa ornyna dereý jetti. Olar tormen qorshalmaǵan ashyq turǵan tereze aldynda otyrǵan balany kóredi. Polıtsııa aǵa leıtenanty Jasulan Sarbalaev gaz qubyry arqyly joǵary órmeledi. Nátıjesinde ashyq terez aldynda otyrǵan balany páterge alyp tústi. Bul ýaqytta Baýyrjan Aldabergen kórshiler arqyly balanyń ata-anasyn anyqtap, olarǵa dereý telefon arqyly habarlasty. Sol ýaqytta balanyń anasy jumysta bolsa, ákesi esik aldyndaǵy dúkenge shyǵyp ketken eken», - dep habarladady QazAqparat tilshisine Qyzylorda oblystyq polıtsııa departamentiniń baspasóz qyzmetiniń mamandary.
Osylaısha ýchaskelik polıtsııa ınspektorlarynyń jedel is-qımylynyń arqasynda úsh jastaǵy bala qutqaryldy. Ol ata-anasyna aman-esen tabystaldy.
Budan buryn Qyzylorda oblysynda adasqan adam qutqarylǵanyn habarlaǵan edik.
