Qyzylordada Rýhanı muralar mýzeıi ashylmaq
QYZYLORDA. QazAqparat - Qyzylorda qalasynyń sol jaǵalaýynan keleshekte rýhanı muralar mýzeıin salý josparlanyp otyr. Oǵan qosa folklorlyq antologııany jınaqtap shyǵarýǵa mán beriledi, dep habarlaıdy QazAqparat tilshisi.
Bul másele Elbasy Nursultan Nazarbaevtyń «Uly dalanyń jeti qyry» baǵdarlamalyq maqalasyna oraı Qyzylorda qalasynda oryn tepken «Rýhanı jańǵyrý» ortalyǵynda ótken dóńgelek ústelde belgili boldy.
Sońǵy jyldarda Syr óńirinde kóne kezeńnen jetken rýhanı dúnıelerdi jańǵyrtý baǵytynda irgeli ister qolǵa alynyp keledi. Jaqynda Mavrıkııde ótken ıÝNESKO-nyń materıaldyq emes mádenı muaralardy qorǵaý jónindegi komıtetiniń otyrysynda Qorqyt ata muralary ıÝNESKO tizimine engizilgeni - sonyń aıqyn dáleli.
Dóńgelek ústel barysynda ǵalymdar mádenı muralardy qorǵaý baǵytynda óz pikirlerin bildirdi. Kezinde ondaı oryndar kózden tasa qalyp, odan tabylǵan qundylyqtar qoldy bolǵan.
«Elbasynyń «Uly dalanyń jeti qyry» baǵdarlamalyq maqalasy táýelsizdik jyldary júrgizilgen arheologııalyq jumystar nátıjesine negizdelgen dep aıtýǵa bolady. Syr óńiri qashan da qazaq halqynyń jáne túrki jurtynyń tarıhynda óz ornyn enshileıdi. Bizdiń aımaqta 50-den astam orta ǵasyrlyq qalalar bar. Olardyń kópshiligi keńestik kezeńde Reseı tarapynan zerttelgen. Ony zerttegen ǵalymdar olardan tabylǵan qanshama muramyzdy qoldy etken. Qola dáýiri kósemderi jerlengen Túgisken qorymynan bútin 250 qysh qumyra Máskeý asyp ketken eken. Elbasy maqalasynda mundaı rýhanı qundylyqtardy baǵalap, olardy saqtaýǵa mán berý qajettigine nazar aýdaryldy. Arǵy tegimizdi taný máselesi tujyrymdaldy», - dedi Qorqyt ata atyndaǵy Qyzylorda memlekettik ýnıversıteti arheologııa jáne etnografııa ǵylymı-zertteý ınstıtýtynyń jetekshisi, tarıh ǵylymdarynyń kandıdaty Ázilhan Tájikeev.
Dóńgelek ústel barysynda folklorlyq antologııasyn jınaqtap shyǵarý máselesi sóz boldy. Bul oıdy fılologııa ǵylymdarynyń doktory Baǵdat Káribzov bildirdi.
«Dúnıe júzinde aýyz ádebıeti úlgilerin 100 tomdyq etip shyǵarǵan jalǵyz el - Qazaqstan. Halqymyzdyń osyndaı shyǵarmashylyq qabiletiniń múmkindigi orasan ekenin aıtýymyz qajet. Ony urpaq tárbıesine paıdalaný - paryzymyz. Sondaı-aq, endigi kezekte Syr boıy folklorlyq antologııasyn shyǵarýǵa nazar aýdarsaq degen usynysym bar», - dedi ol.
Dóńgelek ústeldi túıindegen oblys ákiminiń orynbasary Rýslan Rústemov jıynda aıtylǵan usynystar aldaǵy ýaqytta eskeriletinin jetkizdi. Olardyń qatarynda «Qorqyt» jýrnalyn shyǵarý, jas ǵalymdar mektebin qurý jáne ózge de máseleler bar.
Esterińizge sala ketelik, budan buryn Syr óńirinde jyraýlyq óner dáripteletinin habarlaǵan edik. Sondaı-aq, Qyzylordada Qobyz kúni atap ótilýi múmkin ekeni aıtyldy.
