Qyzylordada Roza Baǵlanovanyń eskertkishi ashyldy

QYZYLORDA. QazAqparat - Qyzylorda qalasynda búgin Qazaqstan jáne KSRO halyq ártisi, Halyq qaharmany Roza Baǵlanovanyń eskertkishi ashyldy, dep habarlaıdy QazAqparat tilshisi.

Roza Baǵlanovanyń 100 jyldyq mereıtoıy búginde ıÝNESKO jáne respýblıka kóleminde atalyp ótip jatyr. Ataýly sharalar Syr óńirinde 20-21 sáýir kúnderi bolady.

«Syrda ónerdiń toıy bastaldy. Syrdan qanattanyp, óresi bıik án padıshasyna aınalǵan ǵazız-ǵumyr ıesiniń mereıtoılyq sharalary Qyzylorda qalasynyń ortalyq alańynda Roza Baǵlanova eskertkishiniń ashylýymen bastaý aldy. Eskertkishtiń avtorlary - músinshiler Murat Sydyqov pen Baýyrjan Kenenbaı. Onyń bıiktigi - 5,7 metr. Tuǵyry granıtten, eskertkishtiń negizi qoladan quıylǵan», - dedi Janat Ashanqyzy.

Belgili ánshiniń kezinde prodıýseri bolǵan Qýanysh Abdýhalımov Roza Tájibaıqyzy «Ǵasyr adamy» ekenin atap ótti. Ańyz adamdy ulyqtaý turaqty túrde júrgizilýi tıis.

Roza Baǵlanovanyń uly Tájen Baǵlanov anasy týraly jyly estelikter aıtty.

«Anamnyń qurmetine Almaty qalasynda murajaı ashylady. Sondaı-aq, týǵan jeri - Qazaly aýdanynda da murajaı bar. Atalǵan oryndarǵa anamnyń estelik zattaryn usynýdy jón kórip otyrmyn», - dedi Tájen Baǵlanov.

Belgili ánshiniń mereıtoılyq sharalary eki kúnge sozylady. Atalǵan shara aıasynda bıyl «Aqmańdaılym» respýblıkalyq ánshiler konkýrsyna barlyq óńirden qatysqan 200 talapkerdiń arasynan 15-i iriktelip alyndy.

Eske salsaq, budan buryn Reseıdiń Astrahan oblysynda Roza Baǵlanovanyń 100 jyldyǵy atap ótildi.